Евксось - те народонь ойме.

«Сказка – великая духовная культура народа, которую мы собираем по крохам, и через сказку раскрывается перед нами тысячелетняя история народа» (А. Н. Толстой).

Евксось – народонь ойме.

       Катянь ульнесь чачомачизэ ды васолбабазо казсь тензэ книга «Рузонь народонь евкст». Нама, Катя а пек кенярдсь книгантень, седе мельс туевель, бути тензэ казевельть од телефон. Ялатеке, тейтерькась саизе книганть. Васняяк, ванкшнынзе артовкстнэнь, мейле ушодсь ловномо. Ды истя ловнозевсь, мик эзизе редяяк, кода сонськак понгсь евксос…

         Вансы – вирь чиресэ кудыне. Совась. Нупалесь а покш, но ванькс. Кияксось краскасо апак вельтя, но киякслазтнэ ожолдыть. Кенкшенть эйстэ  керш пеле – ашо порсо ваднезь каштомо. Каштом икеле Настя урозкесь пани прякат. Шумбракстнесть тейтерькатне. Катянь озавтызе морго экшс ды каванизе ансяк каштомсо панезь прякадо. Те шкастонть совась тенст Крошечка–Хаврошечка ды кандсь севонень кедьгесэ скалонь ловсо. Озасть колмонест морга экшс, ярсасть тантей прякадо, симсть лембе ловсодо. Евксонь  тейтерькатне евтнесть Катянень ававтомо стака эрямодонть. Кувать эзть карма аштекшнеме тейтерькатне – весе капшасть чинь лисемас тевень прядомо. Катянень тейтерькатне казсть якстере атласонь сарафан. Ансяк лиссь кудостонть,  мари тейтерень мазый морот: «Во поле береза стояла, во поле кудрявая стояла…»  Вирькужосо од тейтертне кедте кедьс кундазь  морот морсесть . Весе сынь оршазь эрьва тюсонь атласонь палясо, пильгсэст сафьянонь кемть. Од цератне, перька карксазь каркссо ашо кувака панарсо, виест эйсэ онкстнить: кие бороци,  кие сталмот кепси. Седе ве ено покш нурямот. Катяньгак тердизь малазост. Нурямосо нуризь, моронь кужос сайнизь.

    Катянь сельмезэ каятотсь авардиця тейтерька лангс. Те ульнесь Аленушка. Ялаксонзо Иванушкань салызь Ягабабань мацейтне. Кува ансяк эзть вешне церыненть тейтерькатне. Репкскень таргицятненьгак саизь вешнемензэ. Муизь Иванушкань Емеля вакссто пецька лангсто. Вана дивась: каштомось ульцява арды, лангсонзо церынетне. Печуркасто Пелькаське ваны. Те сон идизе Ягабабадонть церыненть, салыцянть жо каштомонтень пекстызе.

     Сыргась тейтерькась седе тов. Икелензэ покш кев, лангсонзо сермадовкс: «Икелев молят - ине вий вастат, вить енов пурдат – вачо кадоват, керш ено сыргат – апаро тевс понгат» Тандадсь тейтерькась. Кочкизе икелев кинть. Вансы вирькужосо Иван – сокицянь-видицянь церась -  мараля марто бороци. Ве маралясь тумо сяворды, омбоцесь – пандт калавты. Иван цераськак невтизе эсензэ виензэ: кепединзе неть маралятнень тумонек-мезнек ды озавтынзе покш пандо пряс. Вана те рузонь церань вий!  Ве ендо ардсь шержей лишме лангсо колмоце мараля – кшнинь оршамосо, шапказо чугунонь, бокасонзо торо, кедьсэнзэ пшти пе марто кшнинь мандо. Тандадсь тейтерькась, велявтыксэль мекев. Редизе сонзэ шержей маралясь, озавтызе лишменть лангс ды тусть сынь аволь ардомо, а ливтямо. Натой, менельс кепететсть. Сравтовсь тейтерьканть икелев весе Ине Рузонь масторонь мазычись: сэняждыця иневедтне, ожолдыця паксятне, пижелдыця виртне. Валгстызе тейтерьканть волшебной масторс, косо эрить Ведявась, Вирявась, Паксявась. Эрьвась топавты эсь тевензэ: Ведявась вансты лейтнень, ведтнень, Вирявась – виртнень, Паксявась – паксясо сюронть.

      Кода паро  эрямось те кезэрень евксонь масторсонть....

    « Катя, урокот теить?» – кевкстизе авазо. Тейтерькась таймаскадозь ваны аванзо лангс. А кода сон тезэнь пачкодсь?! Ков весе ематотсть? Чарькодсь, евксось тусь, но кадсь тейтерьканть седейс валдо мельть-превть, вечкема тиринь енксонтень, тиринь ломантненень. Кувать тейтерькась ледстнесь те евксонь масторонть, косо арасть, компьютерт, машинат, телефонт… Но тосо ули мезе –бути истямо валдо, вечкевикс.

Чарькодсь тейтерькась, минек историясь целанек сюлмазь евкстнэнь марто. Евксось – те народонь ойме.