"Гөлчәчәк чәчәге" шигыре

Ганиева Нурия

Гөлчәчәк чәчәге

Җирнең ямен, төсен, тәмен

Тоеп алган бер чәчәк.

Коймага терәлеп үскән

Ялгызы бер гөлчәчәк.

Үсеп чыккан урынында

Туфрагы да таш кебек.

Тик гөлчәчәк шат елмая

Яшәүнең кадрен белеп.

Шау чәчәккә күмелгән гөл

Моңаюны белми һич.

Үткән-киткән аңа карап

Сокланалар иртә-кич.

Хуш исеннән гөлчәчәкнең

Әйләнерлек башларың.

Юккамыни шытып чыккан

Җиңеп, тишеп ташларны?!