Салчак Тока "Араттыӊ сөзүнүӊ бирги номунуӊ бирги эгезинде диалект сөстерниӊ ажыглалы"

Эртем практиктиг конференция

«Келир уеже базым»

ШИНЧИЛЕЛ АЖЫЛЫ:

«С.ТОКА: «АРАТТЫН СѲЗУНДЕ»

1-ГИ НОМУНУӉ, 1-ГИ КЕЗЭЭНДЕ

ДИАЛЕКТ СѲСТЕРНИӉ АЖЫГЛАЛЫ»

        Автору:

Дерзиг-Аксы ортумак школазынын

10-гу клазынын ѳѳреникчизи

Донгак Белек Сергеевич

Удуртукчузу:

Дерзиг-Аксы ортумак школазынын

тыва дыл, чогаал башкызы

Кужугет Аяна Ким-ооловна

Дерзиг-Аксы 2015

Допчузу

Киирилде

I-ги эге. Лексиктиг онзагайлар

        1.1.Чадырга хаммарышкан чүве аттары

        1.2.Аяк-сава аймаанга хамаарышкан чүве аттары

        1.3. Ажыл-агыйга хереглээр херекселдерни кѳргүскен чүве аттары

        1.4.Олуттарнын хевирлерин кѳргүскен сѳстер

        1.5.Кижинин аажы-чаӊын, кылдыныын кѳргүскен сѳстер

        1.6. Дүрген шимчээшкин кѳргүскен кылыг сѳстери

        1.7.Кижинин даштыкы байдалын кѳргүскен янзы-бүрү сѳстер

        1.8. Тѳрел-бѳлук илереткен сѳстер

        1.9. Орус дылдан үлегерлээн сѳстерниӊ ажыглалы

II-ги эге. Фонетиктиг онзагайлар

        2.1. Ажык үннерниӊ онзагайлары

        2.2. Ажык эвес үннерниӊ онзагайлары

        2.3. Немелде үннүӊ тыптыры болгаш чиде бээри

III-ку эге. Морфологтуг онзагайлар

        3.1.Ийи дазылдыӊ каттышканы

        3.2.Дазыл+артынчыныӊ каттышканы

        3.3 Янзы-бүрү морфологтуг болуушкуннарда тывылган сѳстер

        3.4. Кылыг сѳзүнүн дѳзунге кожумактарныӊ немешкениниӊ онзагайлары

Түӊнел

Литература даӊзызы

Киирилде

Тыва дылдыӊ словарь составында база бир кол черни диалектизм сѳстер ээлеп турар. Литературлуг дылдан аӊгыда диалектизмнернин хевирлеттинери нацияныӊ дылын улам байыдып турары болур.

        Чечен чогаалга диалект сѳстерни хереглээри чогаалды улам чеченчидип онзагай болдуруп турар. Бистиӊ ажылывыс Тыванын улустун чогаалчызы Салчак Калбакхорекович Токанын: «Араттын сѳзу» деп классиктиг трилогиязынын 1-ги номунун, 1-ги кезээнде каа-хем аялгазы болгаш тожунуӊ диалект сѳстерни хереглээниниӊ онзагайларын кѳргузерин оралдашкан. 

Ажылдыӊ чугулазы:

С.Токанын «Араттын сѳзу» деп романны  чогаал талазы-биле шинчилээн ажылдар бар. А чогаалдыӊ дылынын талазы-биле шинчилел ажылдары эвээш. Чугле  филолгия эртемнеринин кадидады, доцент Доржу К.Б-нин статьязында^[1] дылынга сайгарылга кылган. Ынчангаш диалект сѳстерни хайгаарап кѳѳру ажылдыӊ чугулазы  бооп турар.

Ажылывыстыӊ сорулгалары:

1. С. Токанын чогаалында дылында диалект сѳстерни илередири
2. Каа-Хем аялгазы биле Тожу диалектизинин дѳмейлешкек талаларын тодарадыры
3. Чогаалдын дылында диалект сѳстернин  чамдык грамматактиг талаларын кѳргузери

Шинчилел ажылыныӊ объектизи:

Диалект сѳстер

Ажылдыӊ материалы:

С.Токанын «Араттын сѳзу» деп чогаалындан чыгдынган диалект сѳстер.

Ажыглаан арга-методтары:

Хайгаарал, тайылбырлап бижиири, дилеп тыварынын, шинчилел методтары, анализ, деӊнелге аргалары ажыглаттынган

Ажылдыӊ теоретиктиг ундезиннери:

1. Сат Ш.Ч. Тыва диалектология. 1987
2. З.Б.Чадамба Тоджинский диалект тувинского языка.1974

Ажылдыӊ тургузуу:

Киирилде, 3 эгеден, түннел, ажыглаан литература даӊзызындан тургустунган.

Ажылдыӊ практиктиг ужур-дузазы:

Тыва дыл, чогаал, тѳѳгу башкыларынга, школа ѳѳреникчилеринге факультативтерге ѳѳредилге материалы болур.

        Трилогияда каа-хем аялгазы колдап кирип турар. Чүге дизе чогаалда С.Тока бодун Мерген хемнин эриинге тѳрүттүнген, ону ынак авазы чадырдан үндүрүп кээрге, бир дугаарында тѳрээн Мергенин кѳргенин  чогаалында бижээн. Ынчалза-даа чогаалда Тожу чонунуӊ лексика талазы-биле диалект сѳстерниӊ кирип турары солун. С.Тока чүге Тожу диалектизин чогаалында хереглей бергенил? Чижээ: алажы, одуш дээш оон-даа ѳске. Тожунун диалект сѳстерин ажыглай бергениниӊ чылдагаанын бис ийи талалыг кѳрүп турар бис. Бирээде,  Тыва дылдыӊ диалектилерин янзы-бүрү эртемденнерниӊ бѳлуктээшкини аӊгы-аӊгы деп филолгия эртемнериниӊ кандидады, доцент Куулар Е.М. бодунуӊ статьязында айыткан.^[2] Шулуу Саттыӊ ажылындан^[3] алдынган схема-биле кѳѳрге мындыг:

1.Тѳп диалект

2. Барыын диалект

3. Сонгу-чѳѳн диалект

4.Мурнуу-чѳѳн диалект

5. Холушкак аялгалар (Каа-Хем, Тере-Хол)

«Каа-Хем аялгазы топ, сонгу-чѳѳн, мурнуу-чѳѳн диалектилери харылзаалыг бооп келген болгаш ол харылзашкан диалектилеринин салдары-биле чамдык онзагай чуулдерлиг бооп турар»-  Сат Ш.Ч. ажылында демдеглеп бижип турар^[4]. Тожу болгаш Каа-Хем кожуун кызыгаарлажып кожа чыдар болган тѳлээде,  ооӊ чону харылзаалыг болбайн канчаар. Ийиде. бистиӊ ажылывыста кѳруп турарывыс-биле алырга, база тѳѳгу материалдарында, чогаалчыныӊ дугайында бижээн солунда статьяларда ону Тожуга тѳруттунген чогаалчы-дыр билип алган бис. Тодаргайлаарга,  эртем ажылдакчызы Монгуш Байыр-оолдун «С.Токаныӊ тѳѳгулуг намдары» болгаш башкы Татьяна Кушкаштын: «Мѳѳн-Хѳлдун ажы-тѳлү бис» деп статьяларында номчуурга мындыг одуруглар бар «Тока Тожу чурттуг деп чугаа шагда-ла Тывага тарай берген. А каа-хемчилер: «Чо-ок, бистиӊ чер кижизи чүве. . .» дээш алдырбаан.  Чогаалчы чок апаары чылдыӊ бүдүүзүнде, 1972 чылда Тожунун Мѳѳн-Хѳлге чорааш, кады чораан эштеринге чоон дытче айыткаш: «Бо дыттын баарынга тѳк кээп дүшкен кижи-ле болгай мен» дээн»- деп бижип турар. Чогаалчы бодунуӊ чогаалында  «Тас-Баштыг» деп 2-ги эгеде «Бир-ле ѳйде ававыс бисти кыйгыргылап алгаш, моон кѳжүп, чаа черге чурттаар бис деп чугаалаан. . . . Мерген хемниӊ аксынга чаа чуртувуска чеде бердивис.» деп бижээн. Мергенге, чаа чуртка ѳске черден, хевирин бодаарга, Тожудан-на келгени илдеӊ. Моон алгаш кѳѳрге, С. Токанын Тожунуӊ чамдык диалект сѳстерин чогаалынга ажыглаары Тожуга тѳрүттүнген чогаалчыга элдептиг чүүл эвес бооп турар.

1-ги эге. Лексиктиг онзагайлар

Лексика талазы-биле чогаал ѳске грамматиктиг онзагайларга бодаарга, онзагай черни ээлеп турар.  Алажы (чадыр) тожунун диалектизи деп бодаар бис, чүге дизе,  улуг улустун чугаазындан база М.Байыр-оолдун статьязындан^[5] алырга, ол уеде алажы чадыр Каа-Хем унунга турбаан, Тожу чону кыш-чай дивес  чадырларга чурттар турган деп бижип турар.Мергенге чаа чуртка келгеш бир кижиден сүге дилеп алганы, шарлан алажылыг багай чадыр ѳг ѳпейтип алганын чогаалчы «Тас-Баштыг» деп эгеде бижээн.

1.1.Чадырга хамаарышкан чүве аттары

Тос шывыг- хадын карты шывыг 

Базырткыыш- кидис ѳгге болза базырык баглар

Алажы- чадырныӊ ыящтары

Адагаш- чадырныӊ ыяштары  

…чадырныӊ адагажынга ѳртеп каан мен

1.2. Аяк-сава аймаанга хамаарышкан чүве аттары

Ай-кымзары- черде үнүп турар айны сугар хап. Ону аргып каан болур.

Кымзарлар- ай-кымзарын кызыра адааны

Одуш- ыяштан кылган сава (берестянная корытообразная посудина)

Идиш- ыяштан кылган  сава (сүт, тарак, суг кудар сава)

Алгый- улуг калбак паш «Небольшая плоская чаша»

уру- ыяш аяк

1.3. Ажыл-агыйга хереглээр херекселдерниӊ аттары кѳргүскен чүве аттары

Бара- балык тудар херексел

Шана- кештен кылган чунгулаар херексел

Сүге- балды

1.4. Олуттарныӊ хевирлерин кѳргүскен сѳстер

Күдүе олургаш- күдүйүп алган оргаш

Бүктүйүп алгаш- доӊгайып алгаш (тейлээрде)

Баскактаныр//маспактандыр- буттарын бот-боттарынче суккулаштырып алгаш орары. Чогаалдыӊ сѳзүглелинде сѳстун кайызын-даа ажыглап каан. А словарьда^[6] баскактандыр деп хевири бар. Ынчап кээрге маспактандыр деп хевир диалект сѳс бооп  магатчок деп бодалдыг бис.

1.5.Кижинин аажы-чанын, кылдыныын кѳргускен кылыг сѳстери

Аӊгалаан-девидээн, сүрээдээн

Аялдыргы-аялгалыг, адыыргап              //… аялдыргыы чугаалаан

Эремелзеп – ээрежип чем эреп дээн утка бар //(угбавыс Албанчы-биле) ….куда дүжүрерин эремелзеп турган

Котпактап- бичии коргудуптар бодалдыг

Алдап турган- чазып турган

Сыырар-чиир

Аттынып- кончуттунуп 

1.6.Дүрген шимчээшкин илереткен сѳстер

Чүгүрер- халыыр, маннаар

Чогаалда «чүгүрер» деп кылыг сѳзү домактарда хѳй ажыглаттынып турар. Солун чүве чүл дээрге, «чүгүрер» деп сѳстү сѳзүглелде чүгле кижилерге хамаарыштыр ажыглаан, а «шошкуур» деп сѳс чугле ыды Черликпенге хамаарыштыр ажыглааны бооп турар. «Чүгүрер» бо сѳс Каа-Хем кожууннун чонунун чугаазы, чон аразында нептеренгей ажыглаттынып турарын эскернег бис.

Божуу- дүрген

Божуу чүгүржүнер-ле;

…ававыс келди, божуу-ла, божуу-ла, Салчак

1.7.Кижиниӊ даштыкы хевирин, байдалын кѳргүскен янзы-бүрү сѳстер

Кызыл бут

Кызыл таваӊгай

Чамдык тѳп диалектилерде кызыл даван деп чугаалажыр, а чогаалда кызыл бут, кызыл таваӊгай деп сѳстер барын каа-хемниӊ аялгазы чадавас деп санап турар бис. Чуге дизе чоннун анаа чугаазында кызыл бут, кызыл тавангай деп турганынга таваржып турган бис.

Быжыг-тырыӊ- мага-боду  улуг шыырак

1.8.Тѳрел-бѳлүк илереткен сѳстер

Ирейивис- кырган-ачавыс

Бо сѳсту тожулар «кырган-ача» дээн уткада база улуг назылыг эр кижиге хамаарыштыр хүндүткел кылдыр ажыглап чугаага ажыглаар деп чүүлду эртемденнер база демдеглээн^[7]. А каа-хемчилер база амгы үеде-даа чугле кырган-ача дээн уткада эвес «бээ» (ашааныӊ ачазы азы ашаандан улуг кижилери) дээн уткада ажыглап турар.

1.9. Орус дылдан үлегерлээн сѳстерде

Тыва чон боттарынга эптиг кылдыр ажыглаанындан үн ѳскерлиишкиннери болу бергенинден тывылган  сѳстер

Бѳдүрээ-ведро

Моожа-вожжи

Чогаалда ол үеде орус чоннар-биле кожа-хелбээ чурттап эгелээн соонда тывылганын, ѳске-даа кожуунарда бо сѳстер ажыглаттынып турар .

Роман трилогияда ажыглаттынып турар сѳстернин лексиктиг онзагайларында Тожу кожууннун чадырларынга хамаарышкан сѳстер тѳп диалектилерде ажыглаттынмайн турар. Чамдык сѳстер чүгле каа-хемнин,  тожу диалект сѳстери эвес, а Эрзин, Тес-Хем кожууннарда база ажыглаттынып турар «кызыл бут». Амгы уеде каа-хемчилерниӊ  ажыглап турары «чугурер», «аӊгалаар» сѳстерниӊ барын эскерген бис.

II-ги эге. Фонетиктиг онзагайлар

2.1.Ажык үннерниӊ онзагайлары

Кыска ажык үннерниӊ узун ажык үннер-биле солчуру

Тѳп диалетилерде кыска адаттынар ажык уннернин сѳстерин чогаалда  узун ажык уннерлиг сѳстер-биле солчу бээри

таакпы-тапкы

кыска ажык үннүн орнунга кыска эрин-биле адаар ажык үн-биле солчу бээри

ы/у солчулгазы

сыйбап-суйбап     //     сыйбаттынып- суйбаттынып

былгап- булгап

З.Б.Чадамба тожунуӊ диалектизинде «былгаар» бо сѳстун хевири ажыглаттынып турар деп ажылында бижээн.^[8]

2.2.Ажык эвес уннернин онзагайлары

Тур+н+падеж кожумаа

Тур деп дузалал кылыг сѳзунге немелде үн «н» немежи бээр таварылгалар. Бо таварылга амгы үеде Каа-Хем чонунуӊ аразында нептереӊгей ажыглаттынып турарын деӊнеп эскерген бис.

Авам биле угбам ѳгден унуп турунда ышкаш кашпагайы чок, шагзыргай апаргылаан бар чыдырлар. Келген чон хүлбүсту дергиден чешкеш, союп турунда, Томбаш ирей дугай дег узун даӊзазын кайыладыр соргулавышаан, кайгап тургулаар.

Сѳс эгезинде м/б солчулгазы

маспактанып- баскактанып

п/к солчулгазы

баскактанып- маспактанып

таакпы-тапкы

л/г аяар ажык эвес үннерниӊ сѳс иштинге солчу бээри

 чыдып калбас-чыдып кагбас

2.3.Немелде ажык үннерниӊ тыптыры, чидери

Сѳстун дазылынга немешкен хамаарылга хевириниӊ кожумаан долузу-биле хереглээни

ирейивис-иревис ???

Литературлуг дылда «бичии» деп сѳстун орнунга биче деп сѳсту ажыглап турар хѳй таварылга барын эскерген бис. Узун ажык үннернин орунга кыска ажык үннүн хевирлеттингени. Чогаалда 1-ги номда «бичии» деп хевиринге таварышпаан бис.

биче кижи, биче удуур,  биче чылгычы, биче када туруп-туруп

Кыска ажык үн «ы» болгаш аяар ажык эвес ун «ӊ» читкеш, сѳсту кызырган хевиринде ажыглааны

мырай-мырыӊай

Аас чугаага  болганчок ажыглаттынар бо хевир чогаалда ажыглаттынып турар.

Литературлуг дылда база словарьда^[9] сѳстуӊ эгезинде «т» бижиир болза чогаалда «д» бижиир сѳстуӊ бары солун

тѳлдурт-дѳлдурт (словарь)

 Фонетиктиг онзагайларда 1-ги номдан «сыйбап» деп сѳстуӊ литературлуг «суйбап» деп хевиринге таварышпаан бис. Ооӊ дугайында ы//у солчу бээр таварылгаларны эртеденнер тожу диалектиде барын демдеглеп бижээннер^[10]. Немелде үн «н» «турунда» деп хереглээри амгы каа-хемчилерде бары солун.

III-ку эге. Морфологтуг онзагайлары

3.1. Ийи дазылдыӊ каттышканы

Бичиинийне //бичии ынай

… бир аяк хире хевектиг бичииӊийне деспижигеш салып каан

3.2. дазыл+артынчы тутчу бергени

ыявыла// ыяап-ла

…,а багай салым-чаяаны ыявыла бисче чорудар.

баарлаан//баар боор аан

3.3.Янзы-бүрү морфологтуг болуушкуннардан тывылган сѳстер

-дыргы деп кожумак немешкенде тывылган кылдыныг аргазынын наречиезин тургузуп турар

аялдыргыы чугаалаан  

Үннериниӊ падежинде айтылганын ат орнунуӊ хевирин ажыглааны

оортан//оон

 … чүнү кылырын оортан айтырып бээр

3.4. Кылыг сѳзунун дѳзунге янзы-бүрү кожумактарнын немешкениниӊ онзагайлары:

.Кылыг сѳзунун доозулган вид кожумаан долузу-биле хереглээни

-ывыт/ивит ; -выт/вит ; -вут/вут

бажым сувувуттум- бажым суптум

чорувутчу ирги- чоруптар

хемге каавыткаш- хемге каапкаш

 к.с+гыла//гула кыла//киле

Кылыг сѳзүнүн дагынаан вид кожумаа романнын сѳзүглелинде домактарда хѳй катап таваржып турар. Утказын кѳѳрге, кылдыныгны чаӊгыс хүнде эвес,  кезек үе эрткен соонда ол-ла кылдыныгны кылып турганын илередир турар

Кайгап тургулаар- кайгап турар

 дескиндир олургулап- дескиндир олуруп

дырбаландыр үнгүлээн-дырбаландыр үнген

ирейивисче кѳргүлээр-иревисче кѳрүп

үндүр октагылап-үндүр октап

кс+дузалал кылыг сѳзу+ган

Үенин тайылбыр домаанда дузалал кылыг сѳзунге кылыг сѳзунун келир үезинин кожумаанын орнунга эрткен причастие кожумаан хереглээни. Сѳзүглелде мынчаар ажыглаттынган сѳстер үенин тайылбыр домаанда таваржып турарын эскерип турар бис.

… челбип олурган аразында// челбип орар аразында

…бажын борбаннадып олурганын кѳѳрге// борбаннадып олурарын кѳѳрге

…(тараа)алгыйдан … ундур чаштап турганын кѳргеш/// чаштап турарын кѳргеш

Кедеп олурганын// кедеп олурарын

 Чамдыкта ажылывыска солун болза-даа тайылбырлаары берге сѳстер  таварышкылаар. Чижээ: «аялдыргыы чугаалаан». Бо талазы-биле Эрзин, Тес-Хем база каа-хем чугаазында –шырхыы//шыргыы деп кожумак немежи бээрге, демдек аттарынын чадазын,  деӊнээн утканы илереди бээр деп Куулар Е.М. ажылында ^[11]бижээн. Бис ук чүүлду номчааш, үстүнде айыткан аялдыргыы деп сѳсте –дыргыы деп кожумак –шырхыы//шыргыы деп кожумактын хевири эвеспе деп бодалга кээп турар бис.

Үнеринин падежинде «оон» ат орнунуӊ «оортан» деп хевири романда ажыглаттынып турар.  Ат орнунун «онуун» деп хевири тожунуӊ чонунуӊ чугаазында болгаш мурнуу-чѳѳн диалектиде ажыглаттынып турарын демдеглеп бижээн ^[12]

Түӊнел

        Бис  ажылывыс чогаалда диалект сѳстерни илередип, грамматиказын шинчилээрин кызыткан бирги оралдажыышкын болган. Чогаалчыныӊ боду Каа-Хемге кара чажындан ѳскен-даа болза тожунун чамдык алажы чадырга хамаарышкан сѳстерин ажыглай бергенинин чылдагааны авазыныӊ, Тас-Баштыгнын дылы деп бодаар бис. Тас-Баштыг Тожу чурттуг, чогаалчыныӊ тѳрүттүнген чери база ол. Ынчангаш лексикада тожу чоннуӊ чугаазыныӊ онзагайлары бар. Чүге дизе элээн хѳй сѳстер Тожу кожууннуӊ чонунда бар, а чогаалда ону ажыглап каан ай-кымзары, алажы, идиш, одуш, уру. Лексиктиг онзагайларда каа-хемчлерниӊ ажыглаары «аӊгалава» деп сѳзун ам-даа чон аразында нептереӊгейин эскердивис.

Морфологтуг онзагайлардан чүгле кожумактыг арга-биле тургустунган диалектилерни шинчилээр болза база бир солун ажыл болурунуӊ магадылалы бар деп кѳрдүвүс.

         Ниитизи-биле түӊннээрге роман трилогияда чугле сонгу-чѳѳн диалект эвес (тожу), мурнуу-чѳѳн (эрзин, тес-хем) диалектилеринин чамдык сѳстери база таваржып турарын үстүнде айыткан чижектерден кѳрдүвүс. «Каа-Хем аялгазы тѳп диалект-биле, сонгу-чѳѳн диалект-биле, мурнуу-чоон диалект-биле харылзаалыг бооп келген болгаш ол харылзашкан диалектилериниӊ салдары-биле чамдык онзагай чүүлдерлиг бооп турар»-  деп Сат Ш.Ч. бодунуӊ ажылынга бижээнин үстүнде айыткан турган бис^[13]. Бис  база эртемденниӊ  каа-хем аялгазы соӊгу-чѳѳн диалект-биле харылзаалыг  деп бодап турар бис. Тожу кожуун соӊгу-чѳѳн диалектиге ^[14]хамааржыр. А Каа-Хем аялгазы айыткан диалект-биле харылзаалыг деп түӊнелге келдивис.

Бистиӊ ажылывыстыӊ дараазында сорулгалары:

1. С.Токанын роман-трилогиязында диалект сѳстернин морфологиязын ам-даа чедир ѳѳренип кѳѳрү
2. Романнын 1-ги номунун, 1-ги кезээнде синтаксистиг онзагайларында модальдыг утка илередир домактарны хайгараары
3. Лексика талазы-биле диалект сѳстерни тывылган тѳѳгузун словарьлардан дилеп,  тыва дылдыӊ ѳске диалектилери-биле деӊнээри.

Литература даӊзызы:

1.Бавуу-Сюрюн М.В., Куулар Ч.К. Тыва дылдыӊ лексиказынга факультативтер.- Кызыл. 2005

2. Куулар Е.М. Диалектология практиказы (методиктиг удуртулга). -Кызыл. 2010

3.Монгуш Байыр-оол. Салчак Токаныӊ намдары//Шын, 2005, февраль 1

4. Салчак Тока. Улуг Ужарже. -Кызыл. 2001

5. Сат Ш.Ч.Тыва диалектология. -Кызыл. 1987

6. Сат Ш.Ч. Эртем ажылдарыныӊ чыындызы. -Кызыл. 2006

7. Татьяна Кушкаш. Мѳѳн-Хѳлдуӊ ажы-тѳлү бис// Шын,  2005 февраль1

8. Хадахане М.А. Литературная Тува. -Кызыл, 1986

9. Чадамба З.Б. Тоджинский диалект тувинского языка. -Кызыл, 1974

10. Эртем бижиктери II-ги үндүрүлге. -Кызыл, 2008

11. Эртем бижиктери III-ги үндүрүлге. -Кызыл, 2009

12. Юбилеи писателей. -Кызыл 1999

Словарьлар

1.Биче-оол М.Д, Чамаева Ч.К. Тыва дылдыӊ орфографтыг словары. -Кызыл, 1967

2. Татаринцев Б.И. Толковый словарь тувинского языка. -Кызыл, 2003

3. Тыва-орус словарь –М., 1968