Къостайы къахвæдтæ

          Къостайы къахвæдтæ.

«... Къостайы къахвӕдтӕй ныр дӕр ма Наргомы  дуртӕ хъарм дарынц»,- афтӕ мын фӕдзуры арӕх мӕ баба. Раст зӕгъгӕйӕ, раздӕр дзӕбӕх не’мбӕрстон ацы ныхӕстӕ. Ӕдзынӕг-иу мӕ цӕст ахастон Наргомы къуылдымтыл, дуртыл-иу агуырдтон къахы фӕдтӕ. Фӕлӕ никуы ӕмӕ ницы... Бабамӕ-иу фӕрсӕджы каст бакодтон. Уый-иу фӕлмӕн йӕ мидбылты бахудт ӕмӕ-иу мын загъта: «Ӕрцӕудзӕн рӕстӕг, ӕмӕ  сӕ фендзынӕ». Ӕмӕ та-иу мын фæлмæн,  уарзæгой хъæлæсæй Къостайы царды хабӕрттӕй исты ракодта. Мӕнӕн-иу мӕ цӕстытыл уад, гыццыл Къоста Нары хъæуы гакъон-макъон фӕндӕгтыл йе ‘мбӕлттимӕ дугъы куыд уад, ӕвзалыйӕ-иу дуртыл алыхуызон нывтӕ куыд кодта, йе схæссæг мад Чендземæ-иу куыд лыгъд Хъызмыдæйы хъаугъайæ, йӕ фысты къордимӕ-иу фахсыл куыд сфардӕг...

       Фӕстӕдӕр, хистæр кълæсты, тынгдæр банкъардтон, Къоста ӕнӕкӕрон уарзтӕй кӕй уарзта канд йӕхиуӕтты нӕ, канд  Нары хъӕуы цӕрджыты нӕ, фӕлӕ ӕппӕт адӕмы дӕр. Йӕхӕдӕг цыфӕнды зын уавӕрты уӕвгӕйӕ дӕр кӕй никуы суӕлдай кодта йӕ бӕстӕ. Йе стырдӕр бӕллиц кӕй уыд адӕмы, райгуырӕн бӕстӕ уарзын, фырты  лæггад сын кæнын. Суанг ма авдӕны зарӕджы дӕр сывӕллонӕн мады ӕвзагӕй фӕдзӕхсы :

Бадзурин дӕм: уарз нӕ бӕстӕ,

Ма сӕ суӕлдай кӕн нӕ фӕстӕ,

Ма сӕ бафӕллай,

А-лол-лай!

...Бабайы ныхӕстӕ мӕ зӕрдыл ӕрлӕууыдысты: «Ӕрцӕудзӕн рӕстӕг...» О, ӕрцыд рӕстӕг, ӕмӕ бамбӕрстон бабайы ныхӕстӕ... Йӕ адӕмы мӕтӕй чи тад, йӕхи цардамонд саразынмӕ кӕй нӕ равдӕлд,  абон дӕр ма ирон лӕгӕн табуйаг чи у, ирон адæймаджы рæсугъддæр бæллицтæ кæй номимæ баст сты, уыцы Къостайы къахвӕдтӕ сӕфт никуы уыдзысты канд йӕ раттӕг Наргомы нӕ, фӕлӕ ӕппӕт Ирыстоны дӕр.  Къоста ирон адæмæн ссис сæ намысы тырыса,  сæ ирддæр стъалы,  сæ сæрыстырдзинад.

...Ӕрцыдтӕн та ацы сӕрд дӕр мӕ райгуырӕн хъӕу Нармӕ. Мӕ цӕст та ахастон дидинæгджын уыгæрдæтыл, бæрзонд хæхтыл, айнæг къæдзæхтыл, фӕхстыл, дуртыл. Ӕмӕ диссаг!  Федтон Къостайы къахвӕдтӕ!  Мӕ зӕрдӕ цинӕй айдзаг æмæ мӕхи бабамӕ нылхъывтон. Уый мын мӕ сӕр ӕрлӕгъз кодта ӕмӕ кӕдӕмдӕр ӕдзынӕг ныккаст...

         Уыцы бон ма бамбӕрстон,  ирон адæмы æфсарм,  сæ ныфс, сæ цæсгом, сæ фидар мæсыг чи у, уыцы æрдхæрæны Къостайы кад бӕрзонд хӕссын мӕнмӕ дӕр кӕй хауы, уымӕн ӕмӕ ӕз дӕр дӕн Хетӕгкаты кадджын мыггагæй... Къостайы  зæрдæйы рухс та мын уыдзæн фæндагамонæг цырагъ рæсугьд,  фæрнæйдзаг æмæ  амондджын  цардмæ!