hурагшадай амжалтанууд

Найруулга

Манай нютагай эрхим тамиршад

          Манай нютаг хабшуу газарта, хэдэн хада уулануудаар хүреэлэгдэнхэй.  1727 ондо ород-монгол харуул тогтоогдоһоор, данса саарһануудай түүхээр Сахир нютаг түбхинэжэ бии болоһон түүхэтэй,  энээгээр тоолобол энэ жэл Сахир нютагта 291 жэл болохо.

Бидэ нютаг бүхэнэй үхибүүд интернат hургуулида сугларжа hуранабди, тиихэдээ Сахир нютаг манда сээжэ зүрхэндэмнай дүтэ  боложо, өөрын нютаг шэнги  болонхой.              

                                  Сээжым оёорто дүтэ болоhон,

                                  Сахир нютаг нюдэндэм дулаахан.

                                  Хэлтэгэй таабаймнай нангинаар харана

                                  Ерэhэн нютагжаhан зондо таабаймнай

                                  Хүгжэжэ hуухыень баяраа мэдүүлнэ.

                                  Ород буряад илгараагүй,

                                  Ороhон гараhые угтана, үдэшэнэ.

      «Уһа голоо дахажа, зоной абари зан байха» гэжэ дэмы арад зон хэлсэдэггүй, иигээд абаад харахада, ямаршье нютаг өөрын  шарайтай, түхэлтэй, ямаршьеб даа маягаараа ондоо нютагуудһаа онсо илгаатай байдаг.  Сахир нютагай сахижа, нангинаар хэрэглэжэ, хүгжөөжэ байһан ажал хүдэлмэри, үйлэ хэрэг болобол, минии һанахада энэ бэеэ һорижолгын, элүүр энхэдэ туһатай үбэлэй нааданууд: бүмбэгэтэй хоккей, тэшүүршэдэй урилдаан (шорт-трек) болоно. Эдэ һорилгонуудаар манай нютаг, һургуулимнай хододоо түрүү һуури аймагууд соогуур, республика дотороо эзэлдэг.

                                     Ёһотой эрхим хүбүүд хоккей

                                     Наададаг лэ..

                                     Аймхай хоккей наададаггүй!!!

             Манай нютагта ёһотойл эрэ хүнүүд байна гэжэ хэлэхэдэ алдуу болохогүй! Юундэб гэхэдэ, манай нютагта олон эрэшүүл, хүбүүд хоккей наадаха ехэл дуратай юм. Сахирай хоккеистнуудай бүлгэм хэндэшье диилдэхэгүй жабхаланта бүхөөг гэлсэдэг. Манай хоккеистнууд бултанда жэшээ харуулна. Тиимэһээ манай һургуулиһаа олон бэрхэ хоккеистнууд бүхы аймаг, республика соогуураа таранхай, мүнөө өөрынгөө нютагтаа, һуража байһан газарайнгаа командада түрүү наадагшад болоод байдаг. Тэдэнэрэй бүхы һанаан энэ хоккей тухайгаа. Энээгээр хүгшэн залуугүй наададаг. Энэ зоригтой зүрхэтэй хүнүүдэй наададаг бэеын тамирай таһаршагүй нэгэ хуби. Ямаршье байгаалиин үзэгдэлнүүдһээ тэдэн сухаринагүй.

        Эдэ хэд бэ? - Баир, Бато, Доржо, Слава Балдановууд, Евгений, Баир, Батор, Энхэ Идамовууд, Владимир Галданов, Витя, Сергей, Валерий Дымбрыловтэн, Валера, Цырен Лыгденовууд, Булат Банзаракцаев, Эрдэм Цыденешеев, Содном Похонов, Баир Бальжитов, Доржиев Булат, Дашеев Аламжа, Жапов Солбон, Доржиев Эдик 1997 онһоо хойшо 16 - дахи аймагай чемпионууд, республикын чемпион 2014 ондо. Командын саха хамгаалагшад: Баир Бальжитов, Эрдэм Цыденешеев, Валерий, Цырен Лыгденовтэн – яһала һайнаар сахаяа хамгаалжа, найдамтай тулга байһанаа гэршэлжэ баталан бидэ хахад бүлгэмбди гэһэншүү болоно.

   Үргэлжэ добтолгын үзүүр дээгүүр ябаха, саг зуурын аймшагтай һүрдэлгын байдал эсэрэгүүшэдтэ асарагшад түргэн бушуу добтологшод – Тимур Долгоров, Доржо Балданов, Бато Балданов, Содном Похонов. Содномой команда соо наадахада, тэрэнтэй тэнсэхэ хүн үгыл.

      Хамгаалагшад – эдэ Сергей Дымбрылов, Эрдэм Цыденешеев, Баир Балданов, Булат Банзаракцаев. Добтололго хамгаалалгын наадагшад: Евгений Идамов, Владимир Галданов, Валерий Дымбрылов ба Слава Балданов. Команда ударидан ябагша Баир Балданов. Баир Балдановай, Евгений Идамовай  хүтэлбэри доро ябаһан олон хүмүүжэлэгшэд аймагуудай, республикын суглуулагдаһан бүлгэмүүдэй эгээл эдэбхитэй түрүү хоккеистнууд болодог. 2014 ондо Сочидо болоһон үбэлэй олимпиин нааданда манай һургуулиин хоккей наадаар эгээл эдэбхитэй нэгэнэй  Солбон Жаповта путёвка үгтэгдэжэ, Солбон дэлхэйн эгээл элитэ хоккеистнуудай халуун мүльһэн дээрэ болоһон наадануудые хаража ерэһэн байна. 2013 ондо Дашеев Аламжа, Похонов Содном хоёр Красноярск хото ошожо, хэдэн саг соо Россиин хоккеистнуудай  бэрхэ хүтэлбэрилэгшэдэй доро олон һонин арга шадалнуудые, заалгабаринуудые абажа, улам саашаа  дүй дүршэлөө үргэдхэжэ, түрэл һургуулидаа ерэжэ  нютагайнгаа хүбүүдтэ һонин дүй дүршэлнүүдээрээ хубаалдаа һэн.

         Манай эгээ эдэбхитэй хоккеистнуудай нэгэн Баир Балданов, Евгений Идамов хэдэн үхибүүдые шорт - трек гэһэн һонин тэшүүрээр һургажа, аймагууд соо, республика дотор түрүү һууринуудые абажа, Сахир нютагаа суурхуулдаг юм. 2017 ондо республикын хэмжээнэй шорт-трек мүрысөөндэ Сахир нютагай бүлгэм  түрүүшын һуури эзэлээ. Эндэ хэд шалгарааб гэхэдэ: Идамова Аянга, Идамова Адиса, Цыдемпилова Александра, Абидуева Жаргалма. Евгений Идамов интернат һургуулиин физкультурын багша эдэбхитэй ажаллаһанайнгаа тула - 2014 ондо «Отличник спорта» гэһэн медаль Буряад Республикын спортын зүгһөө зүүлгүүлһэн юм, Баир Балдановта 2015 ондо Россин Федерациин спортын зүгһөө, бүхы зүрхэ сэдьхэлээрээ, өөрынгөө һанаагаараа ябажа  хэдэн олон үетэниие  спортдо һорюулһанай, хүмүүжүүлһэнэй тула хүндэтэй үргэмжэлэл барюулагдаһан байна. Баир Балдановай, Евгений Идамовай хүтэлбэри доро манай Захааминай аймагай нютаг нугануудай олон үеын һурагшад хүмүүжүүлэгдэн гараһан байнад, тиихэдээ мүнөө сагта тэдэ өөһэдынгөө нютаг соогоо үбэлэй наадануудые: хоккей, шорт-трек хүмүүжүүлжэ, нютагайнгаа бэрхэ бэеэ һорилгын хүнүүд болонхой.

         Кореец яһатан Виктор Ан Россин шорт-трегэй бүлгэмдэ орожо, дүрбэн медаль абажа, манай Росси гүрэниие түрүү һуурида гаргуулһан байна. Минии һанахада, хэзээб даа, манай Сахирай үхибүүд суута Виктор Анһаашье дутуугүй, олимпиин дэргэ дээрэ гаража, Буряад нютагаа дэлхэй дээрэ суурхуулхал байха.