Мактанчык

Мактанчык Алсу

Яшәгән ди, булган ди, Алсу исемле бер бик тә мактанчык кыз. Ул икенче сыйныфта укыган.

Һәркөнне әнисе алып биргән әйберләр белән мактанырга яраткан. Дәрестә дә, тәнәфестә дә аннан да күп сөйләүче, мактанучы булмаган. Башкаларны тыңлый да, ишетә дә белмәгән. Шуның өчен аны беркем дә яратмаган.

• Менә миңа нәрсә алып бирделәр, менә минем нәрсәм бар, менә..., менә... – дигән сүзләр, мактанулар көн дә кабатланган.

Бу мактану сүзләрен хәтта урамда үсеп утырган агачлар, кошлар, бөҗәкләр, хәтта җилләр дә ишеткәннәр.

Агачлар арасында бер карт имән булган. Ул Алсуның тавышын ишетүгә:

• Бу кыз мактануыннан кайчан туктар икән? – дигән.
• Мактана-мактана, авызы ачык кала бит инде, - дигән ак каен.

Алар шулай дип әйтүгә, кайдадыр күк күкрәп, яшен яшьни башлаган...

Икенче көнне Алсу урамга чыккан. Авызын ачып мактанасы килгән, әмма тавышы чыкмаган.

Карт имән шунда:

• Менә гел мактандың-мактандың, башка кешеләрне ишетмәдең дә, үзеңнекен генә сөйләдең. Сине генә тыңладылар. Хәзер инде син тыңла, башкалар сөйләсеннәр, - дип әйтеп куйган.

Шуннан бирле Алсуның, мактанасы килгән саен, авызы ачык кала икән.

Дөрестән дә, бу дөньяда син генә сөйләп түгел, ә башкаларны да тыңлый, ишетә белергә кирәк!

Алма керпе

Яшәгән ди Алма исемле бер керпе. Ул кичкә кадәр йокларга яраткан. Башкалар иртән торсалар, ул кич кенә уяна торган булган.

Керпеләр көн дә чыгып китә торган булганнар. Алар җиләкләр, гөмбәләр җыеп кайтканнар. Ә Алма кич белән генә ризык эзләргә чыгып  киткән. Эзләгән, эзләгән, таба алмаган. Шуннан ул алмагачтан алмалар гына өзеп ала торган булган. Бер көн, ике көн, өч көн алма өзгән. Һаман алма гына алып кайткан.

Шуңа күрә дуслары, аннан көлеп, Алма дип исем кушканнар.

Мирзагаянова Диләрә

Теләче урта мәктәбенең 4 нче сыйныф укучысы