"Сыбзэ - сибаиныгъ"

Мы дунай нэфым апэрэ псалъэр

Щыщ сфэзыш1ыгъэр синыдэлъфыбз,

Гур зыгъэгушхоу сигугъэ хаплъэ

Илъэгэ 1уатэу бгъэгум дизыбз.

Мэщбэш1э И.

Сыбзэ - сибаиныгъ!  Ары, мы гущы1эхэр гущы1э ш1агъох, лъэшэу гущы1э лъап1эх, пы1ухьанчъэу, дахэу къэ1уагъэх.

«Лъэпкъыбзэр псэм фэд, убзэк1э умыгущы1эмэ убзаку,» - тинахьыжъмэ а1оу бэрэ зэхэсхыгъэ. «Уиныдэлъфыбзэ п1умылъмэ, ащыгъум уадыгэп ны1а,» - зы1охэрэми сарихьыл1агъ. Ык1и ахэмэ адесымгъэштэн слъэк1ыщтэп, сыгуи къысфидэщтэп. Бзэр лъэпкъым ылъапс, ыпс, ищы1эныгъ. Бзэр ары ц1ыфхэр зэгурызгъа1охэрэр,зэзыпхырэр, зы зыш1ырэр, нэмык1хэм къахэзыушъхьафык1ырэр.

Сыд фэдэ бзи уахътэм дэбэкъон, зэпыу имы1эу, ыпэк1э лъык1отэн фае. Ау сиадыгабзэ къык1угъэ гъогум урыплъэжьымэ , ащ изыужьыныгъэ зыкъызщи1эти, къызщызэтеуцо лъэхъани щы1агъ. Джырэ мафэхэм ныдэлъфыбзэм имэхьанэ нахь зыкъы1этыжьэу, ибаиныгъэ къагуры1оу, ифэшъошэ уаси ратэу, еджап1эмэ ащеджэрэ тимылъэпкъэгъухэми ежь яш1оигъоныгъэк1э ар зэрагъаш1эу зэрэщытыр лъэшэу сиггуапэ ык1и сырэгушхо.

Синыдэлъфыбз! Сиадыгэбзэ лъап1, гъомылэ 1эш1оу ны гущы1эм , быдзыщэм ухэлъэу  укъысфэк1о, къысэш1эк1ыгъэ дунэе нэфым ихьалэмэтыгъэ гъэш1эгъон о убзэ шъэбэ дахэк1э санэ1у къибгъэуцозэ, сщыщы ош1ы, ны папк1эу, укъыск1эрытэу ц1ыфыгъэ шапхъэхэр сэогъэгъоты. Сыда ар зымыуасэр?

Синыдэлъфыбзэу- сиадыгабзэ сянэм фэдэу ш1у сэлъэгъу, зыпэсш1ын щы1эп.

Бзэ зэмыл1эужыгъуабэу щы1э пстэумэ сиадыгабзэ зэк1эмэ анахь дахэу, зэк1эм къахэщэу, анахь баеу сэлъытэ. Сыбзэ дахэ сянэрэ сятэрэ ялъап1эшъ, сэри ар силъап1.

Бзэм тэрк1э мэхьанэу и1эр, уасэу фэтш1ырэм ш1уагъэу къытыщтыр  зыхытагъаш1эу  тхак1оу ти1эмэ атхыгъэр бэ .

«Сыбзэ с1умылъымэ, ш1улъэгъу пщыналъэр силъэпкъ сыдэущтэу фэзгъэлэжьэна ?» - етхы Бэрэтэрэ Хьамидэ.  «Убзэ зыпш1ок1одрэм, уянэ пш1ок1одыгъ, ар къызгурымы1орэм, ыпсэ аритыгъ,» - хегъэунэфык1ы Нэхэе Руслъан.

Ау ныдэлъфыбзэм ехьыл1агъэу, сэ анахьэу сыгу хэпк1агъэр Къуекъо Налбый иусэу «Сиадыгабз»:

Къины,

Онтэгъу,

Хьазаб рып1отэщтмэ –ар 1эрыфэгъу.

Мы апэрэ гущы1эхэм сызэряджэу сыгу къыгъэбырсырыгъ, къыгъэгумэк1ыгъ, гупшысэ зэфэшъхьафхэр сыгу къыригъэхьагъ. Мы усэм Къуекъо Налбый иныдэлъфыбзэу тхьэм къы1уилъхьэгъэ адыгабзэр зыфимыгъадэ щы1эп. Ащк1э джыри зы къас1о сш1оигъор- сиадыгабзэ зэрэин дэдэр, зэрэш1ур,зэрэдахэр, зэрэлъэшыр ары. Мы усэ дэдэм ик1эух сш1одах, сш1ошъыпкъ:

Тыдэ къик1ыни , сикъош, адыгабзэр

Адыгэмэ зэхамылъхьагъэмэ!

Зэк1эми анахь тщыгъупшэ мыхъущтыр, ц1ыфыгъэр, адыгагъэр, тиныдэлъфыбзэ- адыгабзэ дгъэк1одымэ, тэри бжыхьэ пк1эшъэ тэкъожьыгъэу , тызэретэкъохыжьыщтыр ары.

Бзэр – псэ. Адэ Адэ тежъугъэгупшысэба! Тэ тыпсэ тэр- тэрэу хэтэшъумгъэхыжьыба!

Сыфай сэ тиадыгэ къуаджэхэр бэрэ ти1энхэу, адыгэ унагъохэр сабый щымык1энхэу. Ахэр ары тиадыгабзэ, тимы1эжь хъумэ тызлъытхъожьыщтхэр, ныдэлъфыбзэр къытфэзыухъумэщтхэр.

Ныдэлъфыбзэм идахэ п1отэнэу узежьэрэм гупшысэ 1аджыми узы1апащэ, гур къызэхегъэбырсырыхьэ, лъэу пк1этыр нахь стыры хъугъэ пш1ош1эу пкъышъолыр къызэхегъэплъыхьэ.  Зэрэхъурэр къыбгурымы1оу сатыр сатырэу гущы1эхэр къызэхэуцох. Анахь гущы1э 1эш1оу щы1эхэр еупэсы пш1оигъоу, ау икъоу пфэмыгъэтэрэзы фэдэу къыпщыхъоу уак1эдэ1ук1ыжьы. Къэш1эгъуаеп ар зыфэш1ыр . Адыгабзэр ары сибаиныгъэ!

Шъоум фэдэу 1эш1у сыбзэ,

Къэгъагъ хьасэм фэдэу дахэ,

Псынэк1эчъым фэдэу къабзэ

Адыгабзэу- ныдэлъфыбзэр.

Къыдрык1уагъэр ащ рэсэш1э

Ш1улъэгъу дахи сыгу къырелъхьэ.

Сыбзэ –сян, сыгу, сыпсэ

Сянэыбзэу адыгабзэр.

Сочинение:

«Сыбзэ- сибаиныгъ.»

Зытхыгъэр

Джыракъые гурыт еджап1эу № 3

я 9-рэ классым ис к1элэеджак1оу

Шъхьак1эмыкъо Саид.

2019 илъэс