Сочинение "Мордовия. Тяса Родиназень ушетксоц"

МБОУ «Рыбкинскяй средняй общеобразовательнай школась»

Сочинения

«Мордовия.

Тяса Родиназень ушетксоц»

                                                Сёрмадозе  8-це класса тонафнись

                                                           Борискина Натальясь

                                                           Учительсь Каргина Татьяна Сергеевна

2017 кизось

                                                                             Рыбкина, сянгяря мастор,                                                               Ванфтыец шачема кяльть.                                                                             Аш сяда таколфты васта,

                         Ётак хоть сембе перьфпяльть…

Михаил Моисеев

   Коса ба афоль уле ломанць, коза ба афолезе пачфте эряфсь, кизоста кизос сядонга пяк анай седиец ся вастти, коса шачсь и кассь, коса кяпе ласькондсь пиземть ала. Тоза, коса васенцеда марязе кельгомать, озафтозе васенце шуфтонянц. Терди, нльня, эста, кда лядсь эздонза аньцек  лемоц картать лангса. Тя минь Родинаньке, шачема-касома веленьке.                                                                                                      

    Мон шачень-касонь  и эрян Рыбкина мокшень велеса. Тейне сон инь мазысь и кельговись. Тяса азыне васень валнязень, тядянь кядьс нежетькшнезь тиине васенце аськолксозень. Сон ащи пяк мазы вастса.  Ваксканза  кандсыне эсь ведензон Мокша ляйсь, маласонза касы пичень вирь.

   Кода азонкшнесазь атяньке-бабаньке, пяк кунара велеть вастса кассь тумонь вирь. Тяза эряма ломаттне ётасть Мокшеть омбокста. Ляйське шудесь лия вастова. Тунда, мзярда ляйсь кепсезень ведензон, эряма васттнень занцезень ведсь. Сире атятне арьсесть вешемс лия васта. Кунара ни ванондсть Мокшеть омбокс.   Кочкавсть отькорь ломатть и ётасть ляйть тона ширезонза. Вастсь тусь мялезост. Шись ётасы-валдоптсы  перьфть  сембе ширде. Керозь вирть, путсть кутт и тянемс эряйхть тяса. Тяфта ладявсь Рыбкина велесь. Тя ульсь нинге шаржу пинкнень.

   Мон кельгса эсь велезень! Сонь аш кода аф кельгомс. Срафтозень эсь ульцянзон панда боконяса. Ширде ванозь, мярьгат, бта петфтазь петфтафт эзонза. Кудонза покранякс сратфт ваксканза шуди Мокшеть трвава. Тунда велесь вайси панжи саттнень потмос. А кодама пара кизонда! Ялгань келеса ласьконттяма панда пряти кстынкса и нормаленкса. Якатама эшеляма Мокша ляи.

   Кельгса велезень аф аньцек мазы перьфпялензон инкса. Тяса эряйхть пяк цебярь ломатть. Синь маштыхть паксяса работама, жуватань мельге якама. Мушендыхть пинге ваймамс, а кда эряви- кштимс-морамс. Ванфнесазь кунардонь пара койхнень-обуцятнень.

   Ули велесонк «Ляйня» фольклорнай ансамбль, кона улендсь эсь моронзон мархта мянь Эстонияса. Кулхцонкшнесазь кувака морснон и «Шумбрат, Мордовия!» фестивальсовок. А сембода пяк кеняртьфнесазь кувака мокшень мороса праздник шиня эсь велеряйньконь.

    Козя велезе эсь ломанензон марта. Ётксост улихть учительхть, военнайхть, учёнайхть. Тяса шачсь поэтсь Степан Иванович Родькин. Сон шавовсь Великай Отечественнай войнать пингста Ленинградть араламста. Калмаф Ленинградонь Пискаревскяй калмотненди. Кода азонкшнезе бабазе, мзярда школастонк тонафнихне якасть Ленинград ошу    экскурсияс, няезь эсь землякснон фамилиянц тоса.

   Маштыхть велесонк идень касфтома, тядянь-алянь ужяльдема, сире койхнень мяляфтома, инжиень васфтема. А къда кудце пяшксе ломаньда, эстейтьке ули коза лисемс. 2012 кизоня минь республиканьке ётафтозе  оцю иланц «Тёжянь киза рузонь народть  мархта».  Сашендсть лама инжихть маластонь и ичкоздень республикаста, омба масторста.  Велезонк сашендсть инжихть ичкоздень Оренбургонь аймакста. Тоса ули веле тяфтама жа лем мархта. Кафта сядода лама кизода инголе Рыбкинань эряйхне тусть ся шири эряма. Пара мяльса ётась васедемась эсь кунардонь юронь ломаттнень мархта.

Тястонь эряйхне ару ваймот и панжадонь седихть. Сембось тя лезды тейне павазуста эрямс, кельгомс ёмла Родиназень.

   Тейне лядсь аф пяк ламос тонафнемс школаса. Аф содаса, коза прай кизе, но мялезе азомс, мзярда касан и аделаса тонафнемазень,  коса афолень уле- фалу карман лятфнемонза шачема-касома уженязень.