масленица

           Управление образования администрации муниципального

                     района "Усть-Куломский"

             Муниципальное общеобразовательное учреждение

             Ручевская средняя общеобразовательная школа

                     Коми фольклорысь олимпиада удж

                     Тема: Йöввыв дырся обрядъяс.

                                        Гижысь: Попова Мария Васильевна,                                                                                

                                        02.07.1995ч.в, 11-öд класса велöдчысь

                                        Оланiн: Кулöмдiн район,Руч сикт,Шöр  

                                        улича,446.

                                        Уджöн веськöдлысь: Гребенюк Диана

                                        Алексеевна,Кулöмдíн районса            

                                        Руч шöр школаын коми кыв да литература

                                        велöдысь. Оланiн:Кулöмдiн район , Руч  

                                        сикт,Шöр улича,187 «Б».

                                               Руч

                                             2014

                                     Юриндалысь

1.Водзкыв…………………………………………..3

2. Шöр юкöн

1юр.Йöввыв-христианскöй да языческöй обрядъяслöн öтувтчöм; тöв помлöн да тулыс заводитчöмлöн öтувтчöм. Шондí пыдди пуктöм. Йöвыв дырся ритуальнöй сьыланкывъяс да обрядъяс………………………..4-6

3. Бöркыв…………………………………………7

4. 1Содтöд: информаторъяс…………………….8

  2Содтöд: фотокарточкаяс…………………….9-13

                                        Водзкыв

       Олимпиада уджлöн могъяс:

1.Тöдмöдны Кулöмдiн традиция Руч сиктын Йöввыв дырся обрядöн;

      Выльтор:

1.Пыртöма научнöй оборотö 10  выль текст;

2.Тöдчöдöма Йöввыв дырся обрядлысь коланлунсö;

3.Орччöдöма важ да öнiя Йöввыв обрядлысь öткодьлунсö да торъялöмсö.

      Коланлун:

Тайö уджöн позьö вöдитчыны школаын традиционнöй культура, «История  Республики Коми» предмет велöдiгöн, «Краеведение» кружок вылын,пыртны кыдз содтöд материал.

       Анализируйтан материал: уджлöн практическöй подулöн лоö текст,кодъясöс  чукöртöма Кулöмдiн районса Руч сиктысь

Уджлöн тэчас:

--- водзкыв ,кöнi сетöма уджлöн коланлун,тöдчанлун,выльлун.

---шöр юкöн ,кодi артмöма öти юрысь: Йöввыв дырся обрядъяс.

---бöркыв ,кöнi вöчöма удж кузя медшöр кывкöртöдъяс:

--- 1 содтöд: вайöдöма информаторъяслысь индöдъяс;

---2 содтöд: вайöдöма фотокарточкаяс.

                                       Шöр юкöн

                                       1 юр

                         Йöввыв дырся обрядъяс

1.Миян шулысны эз Масьленича, Йöввыв. Кодъяс озырджыка олысны блин пöжалысны, жаритлысны яй, ырöш пувены. Медводз вердлысны зятьяс тьöшаöс, а сэсся мöдарö, тьöша вердэ зятьясэс. Йöввыв мунлыс вежон. Блинъяссэ сетлывлысны гöльяслы, корысьяслы.Пырасны керкаад, сувтасны öдзес дорад, то блинсэ колэ сетны.Чучелаясстэ оз вöлы вöчöй. Рытладорыс том йöз ветлэдлэны керкаысь керкаö, сьылэны сьыланкывъяс, мичаа пасьтасены, быд кöзяйкалы сиöны бур олэм. Кöзяйкаыд гöститэдэ пöжасэн, блинэн. Ветлысьяс аттьöалэны. Блиныс –сíйе шондыыс и эм. Шондылы вöлы йöктэны, бипуръяс гöгöр йöктэны-чеччалэны, шондысэ ошкены. Челядь ислалысны йиа гöра йывсянь воръясэн, даддьöн, кузь лунтыр.

2.Масьленича дырйи да сьылöны,йöктэны,ислалöны, гуляйтэны вöлöн,но век вöлi уджалöны, кöть кутшöм дзоляник нывъяс тiян кодь вöлiм,печкöны вöлi век,медым кыны аслыныс кöлуй.Масьленича дырйи,кор корысьясыд вöлi ветлöдлöны ,оз öтдöртны да блиннас гöститöдöны,сэк вöлi кужöны пöжасьнытö да, катокъяс вöлi вöчöны да ислалöны кодi мыйöн.

3.Гöститöны да рöдняясö ветлöны,Сретенньö лунö вöлы катыдö ветлам гажöдчыны,а мöд  луннас чоййылö ветлам.Чучела вöлi вöчöны лёк кöлуйысь.Гöль йöзлы вöлы блинъястö сетöны,блинъястö Ыджыд лунö да Сретенньö лунö пöжавлöны,Троица лунö да.

4.Асывнас вöлы блин пöжалöны,блиннас вöлы медводз гöститöдöны кулöм рöдвужтö да налысь став лёксьыс прöша корöны,сэк вöлы ислалöны,каток вöчасны да,гöль йöзöс вöлы гöститöдöны  жö блиннад.Том йöз вöлы сьылöны да йöктöны.Шуöны пö,блинныд пö шондi петкöдлö.Водз асывнас вöлы прöша корöны  мулысь да аттьöалöны сiйöс.Чучелатö вöлы лёк кöлуйысь вöчöны быдпöлöса,кыдзи артмас.Блиннад и зятьтö вöлы гöститöдöны ,зять вöлы гöститöдö тьöшаöс.

5.Масьленича дырйи вöлi ёна гажöдчöны,том йöз вöлi сьылöны,йöктöны,гудöкасьöны.Блинсö вöлi миян мамö «чибукöн» шуö,асывнас пöжалас ,пуктас пызан вылö блюдйö да кулöм батьöс вöлы гöститöдö,мамö вöлы миянлысь прöша корö и рöдвужлысь став лёксьыс,прöшатö вöлы корöны и Енлысь,и тöдсаяслысь, öд ставныслысь вöлы корöны : и муыслысь,и ваыслысь,и шондiлысь.

6.Йöввыв дырйи вöлы пöжалэны блинъяс,гöгрöс, шондí кодь формаыс. Том йöз празднуйтэны, гажöдчены. Челядь ислалэны даддьöн и доддьöн, шердынэн, сэсся кодлы мый кивыв. Вöчöны тöлысь войдöр исласян гöра, кисьталэны ваöн и лоö йиа чом.Гажыс муныс вежон чöж. Сарайясын вöчлысны качайяс, сэны качайччисны челядь. А медбöръя лунэ, вöскресенньö, качайччисны том йöз: нывъяс и зонъяс. Радейтлысны гуляйтны вöв додьясэн, мичмедлысны быдсяма ноген. Ставныс пасьтасьлысны мичаа, яръюгыда.Вöчлысны масленича-чучела:сарапана да гöрд чышъяна, пасьтасем морт кодь. Йöзыс копырччывлысны, сьывлысны сьыланкывъяс. Вöскресенне лунэ масленича-чучела сотэны.Öнöдз на сиктъясад празднуйтэны, кöдзыд тöв колльöдэны да гажа тулыс паныдалэны.

7.Блинтö вöлы пöжалöны ид пызьысь,вый пиын,ячменьсьыс ид пызь вöчöны,сэки мельничаыд вöлы да изöны,сывдöм выйас,солыштан,ид пызьсö гудралан да пачö сюян,да блин лоö,рач вылын сэтшöм рöшкыд да чöскыд,мый киад весиг оз öшйы.Зятьыд кö эм,то вердны сiйöс ,вежон чöж сёйисны йöла вöлöга да,а сэсся кос лун заводитчывлiс.Мамö вöлi вöчас  юантор куим литрöвöй сулеяö да юкталас пырысьясöс,кисьтавлiс кока рюмкаö,сэсся юисны да вöлi гажöдчöны:сьылöны,гудöкасьöны,швачкасны-буриктасны, йöктасны. Дорö Изосим вöлi гудöкасьысьыс медбур сиктад ,миянö вöлы волывлö гудöкöн ворсны,сэсся Дорö Изосимö ветласны,сэсся Опонь Васьясö,некутшöм тышкасьöм да юöм эз вöв,гажöдчывлiсны сöмын. Йöктылiсны «Русскую», «Яблочко» , «Шаковъяк».Этша чеччаласны,унанад локтасны да муртса джоджыд оз киссьы.Дорö семьялöн Макарöван Елеяс кутшöм кызöсь вöлiны да семьяöн дозйöн вöлы локтöны,пызан сайö пуксьыласны «кока рюмка» юасны,блин сёясны.Масьленича дырйи колльöдлывлiсны тöв,и радлiсны, мед бур гожöм пуксяс да урожай лоö.4 декабря додь сюр туйö кö лым усяс,урожайыс лёкджык лоö.Тöвсö дзоньнас приметитлывлiсны да сы серти сэсся гожöм кольлiсны.Качай вöчöны да качайтчöны,качайяс вöлiны Ёль бокас Микулай Гришалöн кыр йылас.Ёль пос вöчисны,куим гудöк локтас да праздник дырйи швачкöны-ворсöны: Василь Мишка,Дорöдлöн,Микö Иван эстысь локтас,куим-нёль гудöкöн локтас,да ставныс сьылiгтырйи лэччасны,гажöдчасны да бöр мунасны.Сувтласны мир туй вылын йöктыштасны .Ми,посньыдöсь, вöлы вöтлысям на бöрся.Нывъясыд вöлыны öткодь еджыд юбкааöсь,сьöд ковтааöсь,сэки кöлуйыд лоис нин,ставныс öткодьöсь,сöмын чужöмъясыс разнöйöсь.Коканыс кöтi ,кучик сапöг.Масьленича-улльöн сёйöны,сэсся кос лун лоö-азя шыд позьö сёйны.

Сьыланкыв: Ов,ов,баю-бай,кагук,

Регыд локтас мамыд,

Регыд локтас батьыд,ваяс тэныд блин.

8. Масьленича шулiсны Йöввывдыр.Вöлы  ислалöны масьленича дырйи идзас вылын,вöчöны нарöшнö каток,медым иславны,джуджыд местаясын,сэтшöм местаясö вöлы  корсясны, да миян дырйи масьленича эз тадзи мунлы ,кыдзи öнi,но ми вöлы ислалам кассян чойöд,ёна,дерт,иславлiм,детинаяс миянлы вöлы лöсьöдöны ,мед иславны каток,ваöн вöлы киськалöны.Блинсö öнiя моз жö пöжалöны вый низ вылын ,пöжалöны ульлунъя нянь.Блинъястö вöлы озырджыкъяс пöжалöны ид пызьысь пачын ыджыд рачын.Гажöдчöны,йöктöны,сьылöны важ сьыланкывъяс;блиннад вöлы гöститöдöны и суседъясöс,кулöм рöдвужöс и.

9. Масьленича дырйи ставныс ислалöны,сьылöны да йöктöны;пöжавлiсны водз асывнас блинъяс,йöввыв пöжас;блиныд öд петкöдлö шондiöс и гöрöс жö öд.Том гозъя,кодъяс медводдзаысь öтлаын олöны, пасйисны Йöввыв.Блинöн тай став рöдвужöс вöлы гöститöдам да кулöм рöдвужöс казьтылам.

10. Масьленича дырйи пöжавлiсны блинъяс,миян блинъяс шулiсны «чибö-чаньöн».Блинъяс-тайö шондi  пыдди  пуктöм.Том йöз ёна буди гажöдчисны:сьылiсны,ислалiсны,ветлöдлicны вöвъясöн. Асывнас вöлы корöны кулöм рöдвужлысь прöша,шондiлысь и мулысь.Шондi дорö вöлы шыасьöны,кор сiйö сöмын на кыптö «Шондiöй-валяöй»,том йöз вöлы зэв ёна ворсöны «Валяöй» нима ворсöмысь.

                                        Бöркыв

И сíдз, Руч сиктын масленичасö вöлí шуöны йöввывöн. Сэки пöжавлíсны  гöгрöс блинъяс, шондí кодь формаа. Асывнас вошйöдлíсны кулöмаясöс, рöдвужöс, аттьöалíсны му, шондí, ва. Блинъяссö сетлывлíсны гöльяслы. Ветлöдлывлíсны керкаысь керкаö, сьывлíсны сьыланкывъяс, йöктывлíсны да гажöдчывлíсны. Челядьлы вöчлíсны йиа исласянíн, качайяс.Чучелаяс вöчлíсны ёна бöрынджык, рочысь пö локтíс.

                                1.Содтöд: информаторъяс

 1.Усть-Вымскöй  р-н, с.Вожаёль, Есева Юлия Фёдоровна,18 июля, 1941ч.в.

 2. Кулöмдíн р-н, Руч с.,Игушева Нина Ивановна,5 марта, 1944ч.в.

 3.Кулöмдíн р-н, Руч с.,Холопова Анастасия Герасимовна,16 октября, 1925ч.в.

 4.Кулöмдíн р-н, Руч с., Попова Мария Васильевна,1 августа, 1938ч.в.

 5. Кулöмдíн р-н, Руч с.,Павлова Александра Григорьевна, 2 октября, 1937ч.в.

 6. Кулöмдíн р-н, Руч с.,Кирушева Анастасия Дмитриевна,1926ч.в.

 7. Кулöмдíн р-н, Руч с.,Есева Раиса Ивановна,9 октября, 1921ч.в.

 8.Куломдiн р-н,Руч с., Холопова Анастасия Ивановна,4 января,1924 ч.в.

9. Куломдiн р-н,Руч с.,Холопова Мария Фёдоровна,1937 ч.в.

10.Удора  р-н,с.Макарыб,Павлова Зинаида Григорьевна ,21 февраля1938 ч.в

                                      2 Содтöд: фотокарточкаяс:

                 Блиныд гöгрöс,дзик шондi кодь формаыс.

Блинтö Масленича дырйи вöлi ёна пожалöны жö,челядь ёна вöлi блинтö сёйöны.

          Важдырйи вöлi кужöны пöжасьны,ставыс асланыс.

Масленича шулiсны Йöввывдыр.

Блинсö вöлы пöжалöны вый низ вылын.