Сочинение на тему «Что я Родиной зову?» «Мордовиясь-монь тиринь ёнксом»

МБОУ «Комсомольская средняя общеобразовательная школа №2»

Сочинение

на тему

«Что я Родиной зову?»
«Мордовиясь-монь тиринь ёнксом»

Подготовила: Тулкина Ирина, ученица 7 класса

                                                  Руководитель: Вельдяскина Татьяна Петровна
                                                 учитель эрзянского языка.

2015 г .

                                                              Монгак  вечкса минек ёнксонть,

                                                    Вечкса весе, пестэ пес,

                                                              Истя, кода васень ёвксонть,

                                                              Конань авам тень ёвтнесь…

                                                                                                  Е.Пятаев

           Тиринь ёнкс… Тиринь мастор…Кодат домкат ды питнейдеяк питнейть эрьва  ломанентень валт. Зяро вий, валдо ды вечкема кандыть сынь седейс.

Мекс ломанесь истя вечксы эсензэ тиринь масторонзо, бажи тензэ  весе арсемасонзо, косо илязо уле?  Мекс мельстэ-превстэ зярдояк а туить тиринь ёнксонть ашо килейтне, парсеень лугатне, келей паксятне? Кодамо стака илязо уле пингесь, кода васов илязо пачте ломаненть уцяскась, а стувтови тиринь авась, тиринь келесь,  сэнь менелесь, конанть ало ютась маней эйкакшпингесь.

         Маней эйкакшпинге… Мон истя мерян эсень шкадонть-порадонть ды ловса эсь  прям пек уцяскавокс. « Мон чачинь ды касан Мордовиясо!» -  седейшкава кортан ней. «Мон чачинь ды касынь Мордовиясо!»- мельспаросо карман кортамо икелепелевгак.

        Кода муемс сехте лембе ды виде валтнэнь, штобу сермадомс минек мокшэрзянь масторонть мазычидензэ ды сюпавчидензэ? Те мастордонть, косо истямо ванькс менелесь, тантей ведесь ды гайтевть цековонь моротне…

Нама,  тиринь ёнксонть мазычиденть морыть моротнесэ. Зяро стихотвореният содавикс поэтнэ алтасть минек лейтненень, эрькетненень, виртненень, цветиця садтнэнень! Алкукскак, ванат перть-пельга ды седейзэнть сови певтеме кеняркс. Мордовиясь – ёвксонь тарка!

          А кодат ломанть эрясть ды эрить минек мокшэрзянь масторсонть!   Ломанть, конат эсест тевсэст, превсэст, весе бажамосост  тейсть ды теить минек тиринь масторонть седе мазыекс, сюпавокс, виевекс.

      Вана, Степан Дмитриевич Эрьзя – масторонь келес содавикс скульпторось…  Кувать сонензэ савсь ульнекшнемс Мордовиядо васоло. Но зярдояк сон эзизе стувтне тиринь моданть, конань лангсо чачсь-кассь, тиринь келенть, конантень тонавтызе авазо.  Тиринь масторонтень  покш вечкемантень алтазь весе сонзэ творчествазо, весе изнявксонзо.

    Умок ульнесь Великой Отечественной войнась, ламо шка ютась, ламо ведь чудесь… Зярдояк  а стувтовить Михаил Петрович Девятаевень, Пуркаев Максим Алексеевичень лемест. Сынь, кода  ламо лият мокшэрзятне, рузтнэ, татартнэ, белорусстнэ,  стясть яттнэнь каршо, идизь тиринь масторонть. Путызь пряст, максызь эрямост, штобу минь  эрявлинек  уцяскавсто.

     Сэтьме эрямосонтькак ули   тарка покш тевтненень.  Ольга Каниськина ды Валерий Борчин – те неень шкань геройть, конат теизь содавиксэкс Мордовиянть весе масторонть келес. Неть од ломантне эсест стака важодемасост эрямосонть кенерсть тееме пек ламо.

       Видеяк, минек Мордовиянь сех покш сюпавчись -  ломантне, содавикст  ды аволь содавикст.  Строительть,  сокицят-видицят, лецицят, тонавтыцят…

Чиде чис певтеме вий сынь путыть тиринь масторонть  кемекстамонтень. Весе, кие а сы Мордовияс, неить, кода  сон полавтовсь, кассь, мазылгадсь.  Неить, што ломантнень, и одтнэнь и сыретнень, эрямось тесэ  алкукс вадря.  

«Сюкпря эрьва ломанентень, конась парсте теи эсь тевензэ. Сюкпря эрьва ломанентень, конась вансты эсь народонть коензэ. Сюкпря  весеменень, кить зярдояк а стувтнесызь тиринь келест,» - свал корты монь сырькаем, Антонина Михайловна Чернова. Сон пингензэ перть эсь тиринь велесэнзэ тонавтсь эйкакштнень эрзянь кельсэ видестэ ды мазыйстэ кортамо.

   «Тиринь келесь –  сехте покш сюпавчи, конанть алтызе тенек кезэрень раськесь. Зярс эри келесь, карми эрямо   народось. Ванстодо тиринь келенк,» - тонавты свал сырькаем эйкакшонзо ды нуцьканзо.

«Ков илядо пачкодть пингень перть, ванстынк седейсэнк тиринь масторонтень вечкеманть. Сон лезды тенк весе стакачитнестэ, максы валдо сехте чопода читнестэ, совавты ойментень кемема,»-  сырькаень неть валтнэ,  арсян, кирдевить тонавтницянзо  мельсэ нейдяк.  

      Нама, неень шкатне истят, што ломантненень сеедьстэ савкшны туемс ве ёнов, эрямс лия  масторсо, мик границянь томбале. Минек ине Сура лееськак,  конась чуди эрзянь ды мокшонь масторга, канды ведензэ Рав леентень, а мейле  седе  тов. Истя  минек мокшэрзянь ине раськесь срадсь масторонь келес. Тевесь аволь сеньсэ, монь койсэ, косо тон  эрят.  Эряви седейсэ кирдемс се тиринь ёнксонть, конась тонь тринзеть-кастынзеть, конась макссь тонеть зяро валдо, лембе ды кеняркс. А стувтнемс, кода а стувтнить тиринь аванть.

Евтан поэтэнть мельга седейшкава валт:

                                   Ульть шумбра, тиринь ёнксом,

                                   Каштордост розень паксят!

                                   Тонь ланга, теке ёвкска,

                                    Тетям ды авам якить…

                                                                        А.Сульдина