Дорогая наша бабушка Ульяна.

                                                   Эбээ  Ылдьаана барахсан!

              Атласова Ульяна Дмитриевна 1930  сыллаахха  Томторго  төрөөбүтэ.  Оҕо  сааһа  Дураах  үрэҕэр  эбээтигэр  ааспыта.  Оскуолаҕа  тоҕус  сааһыгар  киирбитэ,  интернакка  олорон  үөрэммитэ  уонна  оскуоланы  бүтэрбитэ.  Ыарытыйар  буолан  оскуола  кэнниттэн  салгыы үөрэммэтэҕэ.

             Холкуоска  бастаан  Дураах  үрэҕэр  субан  сүөһүгэ эдьиийинээн  Өксүүлүүн  үлэлээбитэ.  Онтон  совхозка  Умсаахтаахха,  Биэрэк –Үрдүгэр  ыанньыксытынан  үлэлээбит.  Үчүгэй  үлэтин  иһин  Ленин  мэтээлинэн,  элбэх  грамоталарынан  наҕараадаламмыта.

            Сэрии  ыар кэмигэр  интернакка  олорбута.  Оҕолор  бары   биир  тэҥ  ыарахан  балаһыанньаҕа  олорбуттар.  Ас-таҥас  кэмчи  этэ. Мас  бэлэмигэр,  сайын  от  үлэтигэр  улахан  дьону  кытта  тэҥҥэ  сылдьаллара.

Интернакка олордоҕуна  иистэнэр  массыына  баара.  Улахан  кыргыттар  иистэнэ  үөрэнэн,  оҕолорго  таҥас  тигэллэрэ. Кээнчэ, үтүлүк  тигэн  фроҥҥа  ыыталлара. Ийэбинэн  хос  эбээм  Винокурова Евдокия  ордук  үчүгэйдик  тигэрэ. Киниэхэ  оҕолор  кыһыҥҥы  өрөбүл  иннинэ  эрдэттэн  үлэһэн  кээнчэ, үтүлүк, бэргэһэ тиктэрэр  этилэр. Дьэ,  уонна  онтуларын  кэтэн,  дьиэлэригэр бараллара.  Сорохтор  сатыы  сорҕотун  көлөнөн Томторго да, Сор доннооххо  да тиийэллэрэ. Көлөбүт  диэн  былыр  ат  уонна  таба  буолара.

           Эбээ  Ылдьаана биэс оҕотуттан  билигин  түөрдэ  баар. Уон  сиэннээх, сэттэ  хос  сиэннээх. Кини  оҕолоро  бары  үөрэхтээх, үлэһит дьон.

          Эбээ  Ылдьаана  сүөһүгэ  барыта  37 сыл үлэлээн  биэнсийэҕэ  тахсыбыта, сиэннэрин  көрсүбүтэ. Кини  билигин  85  сааһа.  Кэлин  Улуу  Кыайыы үбүлүөйнэй мэтээллэрэ  барыта  киниэхэ  бааллар.

         Мин  баҕарыам  этэ  киниэхэ  доруобай  буоларыгар, үөрэ-көтө  сылдьарыгар, өссө  да уһуннук  олороругар,  оҕолоругар, сиэннэригэр өрүү  сүбэ-ама буоларыгар, сырдыгы  эрэ баҕарабын!!!

Ахтыыны  оҥордо Өймөкөөн орто оскуолатын үһүс кылааһын  үөрэнээччитэ  Спиридонова  Изольда.