Ийэ-дьол көмүһэ.

Ийэ – дьол көмуһэ.

Аан дойду үрдүгэр саамай күндү, көмускэ тэннээх киһи – Ийэ. Кини баар буолан биһиги күн сиригэр үөрэ - көтө олоробут. Төһөлөөх элбэх тапталы, үөрүүнү – көтүүнү, ол быыһыгар хомолтону ийэ сүрэҕэр түмэн олороро буолуой. Оҕо ыарыйдаҕына, эбэтэр ыарахан түбэлтэҕэ тубэстэҕинэ, кини биһигини кытта тэҥҥэ ыалдьыһар. Сымнаҕас илиитинэн, сэмэй мичээринэн, күүстээх тапталынан эмтиир, сырдык олоххо талаһарга дуоһутар.

        Ийэ биһигини орто дойдуттан туоруоҕар дылы, доҕор – атас, сүбэһит – амаһыт буолан олорор. Ханна да ыраах сырыттарбыт кини долгуйуута, мэлииппэтэ биһигитин кытта тэҥҥэ сырсан араҥаччылыыр. Куһаҕан түбэлтэҕэ түбэстэхпитинэ сүрэҕинэн сэрэйэн, чугас баар курдук буолар, күүс – уох эбэр.

        Мин ийэм аата Марианна Владимировна Заровняева диэн. Кини Өймөөкөөн орто оскуолатыгар саха тылын уонна литературатын учууталынан үлэлиир.  Эбии социальнай педагог үлэтин толорор. Ийэм  биһигини үтүө санааҕа, дьону харыстыырга, көмөлөһөргө, сымнаҕас, сэмэй буоларга үөрэтэр – такайар. Кини суоҕа буоллар Аан дойдуга сырдык, ыраас олох суох буолуо этэ. Ийэ эрэ хараҕа сырдык, тыыннаах уотунан күн курдук олохпут суолун сырдатар. Кини сэмэй мичээрэ  дууһабытын уоскутар, санаабытын көтөҕөр. Биһиги сүбэҕэ наадыйдахпытына, сөптөөх тыллары кини эрэ булан олох суолун ыйар.

        Ийэҕэ саамай күндү – кини оҕото. Тоҕо диэтэххэ, кини эрэ оҕото хайдаҕын уонна хайдах буолуохтааҕын билэр. Онон биһиги, оҕолор, ийэлэрбитин харыстыахтаахпыт, көмөҕө наадыйда5ына сүүрэн кэлэн, үөрүүнү кытта көмөлөһүөхтээхпит. Хаһан да умнуо суохтаахпыт, өйдүү – саныы сылдьыахтаахпыт. Ийэ суох буоллаҕына ким биһигитин куһаҕан тыынтан харыстыаҕай? Онон ийэлэрбитин харыстыахха, убаастыахха, өрө тутан киэн туттуохха!

Заровняев Семен Н.О.Кривошапкин аатынан Өймөкөөн орто оскуолатын 2 кылааһын үөрэнээччитэ.