Сочинение- победитель республиканского конкурса сочинений "Шуда котыр" (Счастливая семья)

Видза оланныд, пыдди пуктана «Шуда котыр» конкурс котыртысьяс!

Гижö тіянлы Кулöмдін районса Пожöгдін сиктысь Миша Петросян. Велöдча ме Пожöг школаса 7-öд классын. Прöст кадö радейта тэчны асшöра гижöдъяс. Пырöдчывла уна гижан конкурсö район да республика тшупöдын.Ассьым рöдвужöс пыдди пукта. Кольöм велöдчан воас участвуйті «Мои семейные реликвии» республика конкурсын. Лыддя, мый менам ыджыд бать кодь Геройыс абу нин сэтшом уна, и на йылысь колö тöдны.

       Семья йылысь кö…Босьтны кö традиция серти, менам семья абу нин ичöт- нель вок да öти чой. Но ме «семья» кывсö гöгöрвоа ёна паськыдджыка. Менам семья- тайö менам  Третьяков рöдöй. Весиг сійö дона йöзыс, кодъяс талун абу нин миянкöд, но олöны миян сьöлöмын.

        Вай заводитам миян керка-пöльсянь. Тайö ыджыд нёль жыръя короминасö лэптывлöма менам ыджыд бать, Василий Егорович Третьяков,Сой Пöла Ёгор Вась нимöн Пожöгдінса йöзыс тöдöны. Но оз нимтöмöн , а гордитчöмöн тадзсö шулöмаöсь. Война вылын кисö воштывлöма. Но пöгибö  абу волöма::- кöкъямыс челядь быдтöма  гöтырыскöд, выль керка стрöитöма, ытшкöма- куртöма йöзкöд радын,  ошлы паныд неöтчыдысь петавлöма вöралігас. Йöзыс шулöмаöсь, тайö Ёгор Васьыслы кö пö вороп сетны, мусö и васö бергöдас. Уна лыда медаль-орденсö семьяын Енмöс моз видзам. А Победа лун- медыджыд праздник миян семьяын. Пöжасяс мам, да став  семьяöн  мöдöдчам  Ыджыд Морт дорö, коді вайис миянлы лунъюгыдсо.Тадзи шулöма Вась верöс йывсьыс ыджыд мам,Лидия Тимоновна. Дона мортлысь кывъяссö пыр тöд вылын кутам.

            Ми пыр на быттьо ыджыд мам- ыджыд бать  ордын олам-красуйтчам: паччöр-пöлатьсö уберитны ог убелитöй. Каям сэтчö да шегъясям, мойдам, печикысь ворсам. Дурам- вильшасям, кок öшöдöмöн паччöр сэрöгсянь кыйöдчам, телевизор видзöдам. А  уна во сайын тані миян  зыбканым  öшаліс. Ыджыдджык вокъясöс бабным на лайкöдліс кысиг-вурсигмоз…Жаль, мый менам ичöтдырйи бабукöй эз нин вöв ловъя…Эськö унаторйö на велöдіс…

 Ыджыд мам чужан лун кежлö Валя внучкаыс (менам мам) пыр ляз дасьтö, сылысь радейтана сеянсö.Мед пö лолыс радлас, мый сылöн рецептъяс серти на унатор пуа-пöжала аслам челядьлы. И ме радейта жö лязтö,ош моз.

              Уна миян семьяын донаторйыс (реликвияыс). Со,шуам, жыннянъяс. Тільгунъяс.Öтиыс ыджыдджык, мöдыс дзоляджык.Неуна вöрзьöдыштан да д-ы-ыр  звöнитö. Кык тільгöмыс кö öтлаасяс, перезвон артмö, еджыд  вичко син водзад сувтö. Но абу вичкоысь тайö кык дивöыс, а Вежа Прокопий Праведнöй часовняысь.  Джуджыд стрöйба вöлöма Пожöгдінаным , 8 метра судта. Зарни крест юрйылас дзирдалöма. .Чужöм бöрас кагаясöс тані пыртлöмаöсь, кулöмаясöс бöръя туйö колльöдлöмаöсь. Колана сійö вöлöма пожöгдінса войтырлы. Ыджыд мам-ыджыд батьлöн на быдтысьясыс гусьöн  вайлöмаöсь жыннянъяссö Пожöгдінса часовняысь комынöд воясö, кор стрöйбасö  кисьтны заводитöмаöсь. Уна йöз ордын эмöсь талунöдз и öбразъяс, и кöлöкöлъяс.Ми пö видзим, и ті эн шыбитöй- коркö ковмас на йöзыслы.

 Корсюрö мам босьтас жыннянсö да керкасö кытшовтö, мед пö став лёкыс бокиті мунас. А восьтасны кö коркö Пожöгдінын часовнясö , то бöр став видзöмторйыс  ас местаас локтас, став йöзлы  бара кутас служитны.

          Видзам ми  и 1880 вося молитва книга. Лист пельöсъясыс чирйысьöмöсь нин. Мам босьтас сійöс  да кагаöс моз первой морöс бердас шонтас.Тубрас пиын видзö.Век кевмысьö сы серти миян вöсна, мед бур олан туй аслыным бöрйим. Менам чой-вок öд ыджыдöсь нин, бокын олöны, уна йöз пöвстын. А мамыдлöн молитваыс пö медся вына…

              Эм миян ордын  и коми  вöралысьяслöн  традиционнöй паськöм, чужва вöчан дозмук, уна медаля ыргöн самöвар, ыджыд мамлöн  «Медаль метеринства» наградаясыс..

         Öні унаöн  сиктад  керкаясныснысö выль ног вöчöны- мичмöдöны, а миян унатор на важнога. Миянлы унатор музейын моз позьö видлыны ас киöн, мед кывны, кыдзи овлöмаöсь менам дона йöз. Гашкö, тадзи и вуджис меным да менам вокъяслы чужан сикт да вöр-ва дорö муслуныс, пöль –пöчлысь традиция пыдди пуктöмыс. Гашкö, сы вöсна и мам, и вокъяс, и ме радейтам гижны кывбуръяс. Найö быттьö вöзйысьöны йöз водзö..Ичöтик шор моз корсьöны аслыныс туй…

             Вот татшöм менам семьяöй.Со татшöмöсь ми,  Пожöгдінса  Ёгор Васьлöн быдтасъясыс!

Уджсö дасьтіс Петросян Михаил Евгеньевич, Пожöг МБОУ «СОШ»-са 7-öд классын велöдчысь.

Уджöн веськöдлысь- школаса коми кыв да литература велöдысь Игнатова Елена Александровна.