Творческие работы

Муниципальное общеобразовательное учреждение «Кочкуровская средняя общеобразовательная школа» Дубенского муниципального района Республики Мордовия

Конкурс сочинений

«Наши истоки»

Сочинениясь

«Тиринь ёнксом - Кочкурвелем»

     Тиринь мастор. Чачома енксом. Мон эрян мазый мокшэрзянь масторсо – Мордовиясо. Россиянь картанть лангсо сон а неявишка, ялатеке кастась сон мирэнтень – масторонтень  ламо превей, талантливой,  тевень вечкиця ломанть.    Кадык аволь сюпав    минек республикась  промышленностезэ, пертьпельксэнь ресурстнэнь коряс, но пек сюпав превей, талантливой ломаньсэ. Мекс бу а ледстямс тесэ  скульпторонть Степан Эрьзянь,  войнань геройтнень Михаил Девятаевень, Максим Пуркаевень, олимпийской чемпионтнэнь Ольга Каниськинань, Валерий Борчинэнь ды ламонь-ламонь лиянь. Неень патриархонть Кириллэнь, «Сырнень суркс» ансамблянь морыцянть Надежда Кадышевань, мирэнь боксонь чемпиононть Олег Маскаевень  истя жо раськень ундоксост  сюлмавозь те кезэрень народонть марто.      

         Мон чачинь-касынь эрзянь кезэрень Кочкурвелесэ.  Ансяк валгат велентень, ашо кевень сэнь купол марто церькувась васты эрьва сыцянть,  ильти эрьва туицянть. Гайгиця баягань вайгелесь  терди эрьванть варштамс эсензэ потс, ванськавтомс раужкадозенть.

     Эскельксэнь ютазь – школась,  эйдень кужось, конатне кенярдстыть эйкакшонь шалтсо ды кемевтить икелепелев, што велесь эриця. Минек школанок содавикс, секс мекс тестэ лиссть истят мирэнь келес содавикс ломанть, кода эрзянь келень содыйтне: Е.В.Скобелев ды М.И.Наумкин, кода СССР-нь Народной учителесь С.И.Дергачев, художниктне-ялакстнэ Дыринтнэ, поэтессась Любовь Дергачева ды ламот лият. Истя жо явови школанок сеньсэяк, што парсте тесэ ванстови тиринь келесь. Тесэ а виздить кортамс эрзякс: уроксояк, уроктнень юткстояк маряви те мазый, гайгиця келесь. Тень коряс школантень а весть сакшность инжеть республикань томбальдеяк. Тесэ ютавтневить семинарт, натой сакшность Европарламенстстэ представительть, конат арсесть, што велесь рузыясь. Но минь сыненст невтинек, што эрзятне кеме народось, ды овсе аволь чопода ломанть.

      Школастонть кинть трокс стявтозь эште сэрей вейке кевень кудо – те велень культурань кудось. Тесэ ютавтневить паро мероприятият. А стяко сон ловови Культурань центракс, ды сонензэ ютазь иестэ максозель Республикасо омбоце таркась национальной койтнень-кирдатнень ванстомга.

     Ютат седе тов – ушодовить колмо ульцятне, конатнень пачк канды эсь ванькс веднензэ Ламад лейнесь. Колмо енов явововить китне: Шоболев, Одвелев, ды Верепев. Колмо ульцят, конат рузонь лемест ледстясызь ансяк сестэ, зярдо эряви сермадомс адресэнть документс. Вейке неть ульцятнесэ – Шоболесэ -  эрян монгак. Эрьва валске стямсто, кодак варштан чилисемань мазычинть лангс, Пазонтень евтан сюкпря, што макссь монень эрямо те велесэнть.

     Кудом, удалганок чудиця лейнесь, ков эрьва кизэнь валске сырькаем марто чийтяно чамань ервалдомо, касыця кудо вальмало килеесь, конань тарадонзо токить модас, теке эрзянь мазый тейтерень сравтозь кувака черть, те ульцясь, кись, кува вана уш  кевейксэе иень перть яксян…

                              Те  монь тиринь мастором ,

                              Тесэ эри народом.

   Монь велесэ, кода уш кортынь,  эри тевень вечкиця, келень ванстыця эрзянь раськесь. А эрьва велень эриця тень коряс шнасы эсь велензэ, а мон шнаса ды евтаса сень, што велесэнек кудотне сявадстыть сельмть, эрямонь условиятне уш а явовить ошонсетнень эйстэ.  Эрьва кудо икеле аволь вейке транспорт, кода велесэ важодемань, истя и ардтнемань. Малав эрьва кудосо, косо улить тонавтницят, студент, компьютерт. 

     Мазый перть пельксэськак велесэнть, веленть юткова чудить кавто лейнеть, косо эйкакштнэ кизна экшелить, кундсить калт, тельня налксить хоккейсэ. Пиже виртне кенярдстыть ягодасо, пангсо.

   Велесэнек малав весе эрзят, но улить и рузт, татарт, украинецт, киргизт, узбекть. Но евтаса сеньгак, што сынь весе ней уш эрзят, аволь ансяк чарькодить, но и кортытькак, ды, теде башка, эйдесткак тонавтыть эрзянь келентень.

    Кочкурвелень ломантне седеймарицят, весемесэ лездыцят. Сынь а ютыть вакска, бути теевсь кодамояк зыян, мелявтыть кисэнзэ веленек, лездыть-оймавтыть, кие мейсэ машты. Бути жо кеняркс ломаненть, кенярдыть лиятнеяк. Мельс леди се,  кода састь велезэнек татаронь семия. Ошсо эрямотаркаст савсь миемс, тестэ рамасть таштола кудыне. Кияк эзь юта вакска, кие мейсэ маштсь лездасть тенст стямс пильге лангс.

    Те эштё весть кемевти: минек народось кеме.  Ансяк вейсэ,  ве мельсэ  эрязь, стакаськак седе шождалгады, кенярксоськак седе покшолгады.

        Вечкса мон тиринь велем, сонзэ пертьпельксэнть, вечксынь тесэнь эрийтнень. Те вечкеманть седейзэнь совавтызь сырькаем, авам,  эрзянь келень тонавтыцян. Монгак те кистэнть а  туян  –  арсян поладомс тонатнемам  филологической факультетсэ. Икелепелев арсян теемс весе, штобу ванстоволь эрзянь келесь, тиринь раськесь.

    Эште  вишка  классо тонавтнемстэ седейзэнь педясть Емельян Пятаевень валонзо, сынст эйсэ прядсаяк эсень видькстамом:

Пек паро минек масторсо!

Марят азорокс эсь прят

Ды содат тон – эрьва косо

Перькат ялгат, оят, братт...

…Минек виенек сень эйсэ

(Те совась эрямочис):

Эрьванть кис мелявтыть весе

Ды эрьватась – весень кис.