Мама-(после папы) самый главный человек в жизни

                                           Управление образования администрации

                                           муниципального района « Усть-Куломский»

                                   Муниципальное общеобразовательное учреждение

                                   Ручевская средняя общеобразовательная школа

                             Районса  « Мама- мой самый главный человек в жизни»

                                                  конкурс вылő гижőд.

                Тема: «Ме да озтусь чой,

                            Муса бать да мелí мам

                            Шуда поз ми артмőдам»

                                                                           Гижысь: Гребенюк Арина Руслановна,

                                                                           23.07.2001ч.в., Руч шőр школаын 5-őд

                                                                            класса велőдчысь.

                                                                          Уджőн веськőдлысь: Гребенюк Диана Алексеевна,

                                                                          Руч шőр школаын коми кыв да литература

                                                                          велőдысь.

                                                         РУЧ

                                                          2012

                                         “Ме да озтусь чой,

                                           Муса бать да мелi мам

                                           Шуда поз ми артмöдам»

                                                                                         «Мусаöй дай менам мамöй,

                                                                                          Сьöлöмшöрöй, дыр на ов.

                                                                                          Шуан кыв да -шогöй ямö,

                                                                                          Петас нюм да-югдö лов»

                                                                                                             (В. Лодыгин)

           Мам-меддона морт став му вылас, и на йылысь позьő сернитны дугдывтőг. Кутшőма сíйő радейтő да жалитő ассьыс быдтасъяссő, őд тадзи некод оз куж и оз вермы. Найő сетőны миянлы ассьыныс став вынсő. Муса мамук- тайő кывйыс сэтшöм шоныд да мелi, мый быд мортлöн сьöлöмыс сылас да небзяс тайö кывсö шуöмысь.

           Мый ме верма висьтавны аслам аньтуя  да енбиа мамук йылысь? Менсьым медддона да медрадейтана мамукöс шуöны Диана Алексеевнаöн, кодi чужлiс 1977 воын Кулöмдiн районса Руч сиктын. Руч да Дереваннöй школаын велöдчигöн пыр вöлöма медбур велöдчысьяс лыдын, быд боксянь зiльöма петкöдлыны асьсö сöмын бура. Школа помалöм бöрын мунö велöдчыны öтиöд номера Куратов нима Сыктывкарса педагогическöй училищеö, велöдчöм помалöм бöрын сíйöс ыстöны уджавны аслас чужан сиктö, и öнöдз дас вит во нин велöдö челядьöс Руч шöр школаын, нöшта уджысь орöдчывтöг помалö СГУ. Öнi велöдö школаын роч да коми кыв, литература урокъяс, лоö 11-öд класса велöдчысьяслöн юрнуöдысьőн, тайő мőдőд челядь котыр нин, кодъясőс лэдзő мамук аслас тőждысяна бордъяс улысь. Меным уси пай тырвыйő кывны ачымőс шудаőн сыын, мый менам мам -велőдысь школаын и гортын. Збыль кő висьтавны, őд тайő абу кокнитор, пыр колő лоны  медводдзаяс лыдын бурőн, мед оз янав сылőн юр. Урокъясыс сылőн мунőны мойдын моз, торъя нин лыддьысян урокъяс. Зэв вőлi дивő, шемőсмőдана, кыдзи сiйö лыддьö литература гижöдъяс. Чуйман да синтö он вермы вештыны, дзик быттьö сцена вылын артистка кодь, а гöлöсыс есь, гора, ылöдз юргана. Мамуклöн быд кыв вöлì небыдöн, донаöн да эскöданаöн. Аслас кыпыдлунöн кужис ловзьöдны гажтöм урокъяс.

       Сиктын мамук тöдчана морт, бурö да пыдди пуктана, вылö донъялана морт.Йöзыскöд сíйö сибыд, вежавидзысь, öд быд лун школаö локтöны челядь, быдöн дорö колö торъя сибалöм.Мамö кужö ставныскöд аддзыны öти кыв. Мукöддырйи весиг ичöтик  вежалöм босьтлö, но оз дыр кежлö.

          Олам ми семьяын мирын-ладын. Кор мамö гортын, оланíныс югзьö. Мича дзоридз моз сíйö гажöдö керканымöс. Став гортгöгöрса да керкапытшса уджсö вöчам ставным öтув да öтсöгласöн, öта-мöдöдöс кывзам да зык-шумыс оз и кыптыв. Мамукöй- киподтуя, кыпыд ловруа нывбаба, зэв чöскыда пусьö-пöжасьö, торъя нин артмöны рыська да картупеля шаньгаяс. Медвылыс могöн челядь быдтöмын мам-бать лыддьöны öта-мöдöс пыдди пуктöм, бура велöдчöм, спортö водзмöстчöм, быд уджö зíльöм-нырччöм. Мамуккöд ми сернитам быдтор йылысь, быд юалöм вылö сылöн эм вочакыв. Менö сíйö гöгöрвоö, ме ог пов юксьыны сыкöд аслам гуся мöвпъясöн.Менам чайтöм серти, быд мам кöсйö, медым налöн быдтасъясыс асшöр олöмын мунíсны веськыд туйöд став сьöкыдлунъяс да мытшöдъяс венöмöн.Сíйö велöдö миянöс эскыны йöзлы, аслыным, сетö ассьыс тöдöмлунъяссö, кужанлунсö, ловбисö да олан гажсö,тшöктö пуктыны асьтö морттуйö да вылö донъявны Морт Ним.

       Меным мам ен кодь. Аслам медавъялы, медмусалы, медмичалы сиа крепыд дзоньвидзалун, шудлун да радлун. Ставсьыс аттьö, и юр вывсянь кок улöдз копыр!