Рашид Рашидов

                   Ученик: Султанахмедов Амиран

                                                              Учитель: Ибрагимбекова А.А.

         Даргала машгьурси поэт, прозаик, драматург, переводчик  Р. Рашидов акIубси сай 1928 ибил дуслизив Сергокъалала районна  Ванашимахьилизив. Илини Сергокъалала педучилище, 1949 ибил дуслизиб Дагъиста пединститутла (гьанна университет) исторический факультет , гIyp - Литературный институтлизирти ЧебяхIси даражала литературный курсани  тамандариб.

Р. Рашидов РСФСР-ла ва ДАССР-ва писательтала Союзла правлениела член сай, Дагъиста халкьла поэт сай. Ил С. Стальскийла  ва Гl. Батирайла умачилти премиябала  лауреат сай.  1980 ибил дуслизиб илис «ГlяхIси бархIи» бикIуси жуз багьандан Г. X. Андерсенна уличилси халкьани-ургабси премияла ХIурматла диплом бедиб.

Гьалар-гьаларти поэтла назмурти дурадухъунтири 40 ибти дусмазир районна ва республикала газетабазир, «Гьалмагъдеш» журналлизир.

1948 ибил дуслизир Р. Рашидовли дураиб кIел жуз «Дила талихI» ва «ГIяя-Кьакьа». ИлхIейчирад Р. Рашидовла назмуртала ва поэмабала урегцIалицад  жуз дурадухъун, дарган, урус ва  цархIилти   мезаначил   МяхIячкъалализир,   Москвализир.

Илди биштIатас, жагьилтас, гьести гIямрула адамтас багъишладарибти сари.

Р. Рашидовли сунела жузазиб имцlаливан бурули сай духути, саберхурти, гIякьлучебти ва разити дурхIначила.

Илди дурхIначила поэт халаси разидешличил, пахруличил гъайикIули сай, илини дурхIнала гIямру ункъли далули сай. Xlepa, илдигъунти сари назмурти «Кавказла дурхIни», «Гlякьлучевси булхъран», «НикIа космонавт», «Муса  халавиули сай», «Агь, Ибрагьим, Ибрагьим». Поэтли дурхIнас лукIули сай мицIирагличила, тIабигIятличила назмуртира. Илдазиб Р. Рашидовли бучIанти тянишбирули сай мицIирагличил, илдала хасиятуначил, тIабигIятлизир дирути анцIбукьлумачил, жагадешличил.

Р. Рашидовли делкIун гIяхIцад поэмабира. Илдазир поэтли сипатдирули сай дубурлантала гIямрула гIяхIцад манзилти ва шалуби. Илдигъунти сари «Миъ», «Гlяя-Кьакьа». «Мекъ бемжурли саби дила шилизиб», «ЧIакнани пукьни урдалтухIели», «Адамлис деза» ва ц. Поэтли Батирайла гIямрулис багъишлабариб назму кьяйда белкIунси «Далайчила пикруми» бикIуси повестьра.

Сунела назмуртазиб поэтли адамла халаси гьунарличила, илала цIакьличила, пикрумачила, дунъяличир кадиркути анцIбукьлумачила бурули сай.

Рашид Рашидовли дурхIнас пьесабира делкIун. БелкIун илини «Далайчила бебкIа» бикIуси хабарра. Илизиб поэтли бурули сай С. Кьурба гIямруличила, илала бебкIаличила.

Р. Рашидовли даргала литература давлачеббариб, ахъбуциб, гьалабяхI арбукиб. Илала творчестволи улкала дахъал миллатунар литературализи белгиси пай кабихьиб.

   Гlяхlцад  назмуртазиб  поэтла—гражданинна  бархьси  ва  чlумаси,детаурти  анцlбукьуни  дакlу—гьаргли  урдирхъуси  хlекьси  пикри зайбулхъули  саби.»Агь-гьай,нуша  гъарибти» бикlуси  назмула игитли улкализир  детарути  вайти анцlбукьуни  хlякимтала  баркьудлумала  асурти  диъни балули сай .lАрцлис  се-дигара асес вирниличила  бурули  сай илини- хlякимдешра, депутатдешра:

                                                                        Дигулрив депутатдеш-

                                                                        Арцла гавлаг гьаргбара-

                                                                        Бара-бара биалра,

                                                                        Ил гавлаг гlулабара.

Сунела  дагьрили,сунела  уркlили  кьабулхlедирути   анцбукьуначила  гъайикlули  сай  Рашид  Рашидов.

                                                           Кадизурли хlеб сари.

                                                           Агь, дунъя   тамашала,

                                                           Чинабу хlела цlябдеш,

                                                             Чинабу хlела шала?

                    Дунъя  цашаликарси  ахlенхlели,цlябдешра  шаладешра  лерхlели, ил  тамашала  биъни  иргъахъули сай  поэтли.

Назмула сюжет алкlахънила ,дугьбачил  гlеббурцнила кьяйда ахтардибарибхlели ,ашкарбирули саби поэт гlядатла ахlенти гъай жагадирути  гlягlниахълумагlив  умцlули хlейъни . Амма назмула  бухlнабуцли,  илала  сюжетли  мурхьси  мягlна  бихули  саби.

  Амма  адамла  челябкьлаличи  бирхауди  кабурхули  ахlен.  Дусми  ардашалра,  зубарти  дилшути  ахlен.  

Лерти  сари  даимти  кьиматуни. Гlяламатла  образуни  ургали  аргъахъили  саби  ил  хlекьдеш:

                                   Ляркьян  хlеб, ляркьян  низби,

                                   Чудни  диру  нешана,

                                   Хlяндиубти  супелти

                                   Кьяртlлукlа  дудешуна.

  Нешанани  дарибти  низбала  чудни,  дудешунани  кьяртlлукlути  супелти----дунъяличир  гlямру  даимдиънила  ишаратуни (символти)  сари.

  Поэтли  уркlи—уркlилабад  пахрубирули  сай,  сунени  делкlунти   назмурти   дурхlнани  дурсрачир  дучlухlели.  Даргала  халкьла   художественный  дагьрилизиб  Рашид  Рашидовла  творчестволи  белгиси  мер  буцили  саби.                                                                                                                                                                                                                                                                                                                                                                                                                                              

   Хlебла  гьав  уркlилизибли,  неш  ванзалис  ва  илала  гlяхlти  адамтас  икрамикlули,  вайтас  лягlнатикlули  сай  поэт  сунела  пергерти  назмуртазив.