Кöзöда пöгреб морт овмöсын.

МБОУ «Абъячойса шöр школа»

Луздор районса В. Юхнинлы сиöм IX лыддьысьöмъяс

Кöзöда пöгреб морт овмöсын.

Уджсö лöсьöдiс: 8-öд Б класса велöдчысь

Елина Екатерина

Юрнуöдысь: коми кыв велöдысь

Куликова Татьяна Ивановна

Абъячой

2014 

Видза оланныд! Менö шуöны Елина Екатерина. Менам докладлöн темаыс «Кöзöда пöгреб морт овмöсын»

Öнія наука да инженеръяслöн удж пыртöны морт олöмö быдсяма вöчöмторъяс да выль техника-электроника. Тадзи йöзлы сюрö позянлун кокньöдны ассьыныс олöмсö да мöвпавтöг вунöдны пöль-пöчьяслысь оланногсö. Тайö туялöмын ме кута видлавны öнія морт овмöсын ковтöм-вунöдöм кöзöда пöгреблысь вежöртассö.

Уджлöн видлалан могъяс:

- петкöдлыны пöгреблысь аслыспöлöслунсö;

- коми мортлöн оланног йылысь тöдöмлунъяс паськöдöм;  

- коми культура дорö муслун чужтöм да сöвмöдöм.

Уджлöн коланлун:

Талун наука мунö пыр водзö, та вöсна сиктъяс либö сöвмöны-быдмöны каръясö, либö кусöны-бырöны. Öнiя коми морт выльмöдöм процессъяс улын воштö национальнöй аслыспöлöслунсö. Тадзи бырöны быдся нациялöн культурнöй донъяс да нэмъясöн чукöртöм тöдöмлунъяс. Тайö туялöмыс петкöдлö, мый öнiя том войтырлöн ыштöм ас культура дорö выль пöв чужö да сöвмö.

Тайö уджнас позьö вöдитчыны коми кыв, литература да краеведение урокъяс вылын.

Ставöн тöдöны, мыйла морт овмöсын колö холодильник. Öтчыдысь менам юрын чужис юалöм, кыдзи важöн олісны сытöг. Медводз шыöдчи компьютер дорö, интернет сетiс меным стöч воча кыв. Вöлöмкö, усадьба вылас кыпöдлöмаöсь пожöмысь пöгреб. Пытшкас перйылісны гу. Сэтчö тулыснас пыртлісны лым, коді сывліс сöмын гожöм помын. Лым ыркöдiс сеян-юансö да эз сет сылы тшыксьыны.

Школаысь мунiгöн ме пыри лыддьысянiнö, тöдмаси небöгъяскöд. «Традиционная культура народа коми» небöгын тöдчöдöма крестьянскöй усадьба йылысь, мый сэні вöлiсны амбар (корсюрö и некымын), рыныш, кöзöда пöгреб, пывсян. Ставлöн кокни конструкция – нель стена сруб.

Медым бурджыка тöдмасьны важъя олöмкöд, ме юасьышті Урнышева Елена Александровналысь. Верöс сайö петöм бöрын (сюрс öкмыссё квайтымын сизимöд воын) сiйö локтiс овны выль котырö. Верöслöн бать-мамлöн вöлiс нин ас овмöс: керка, пывсян, жытник да кöзöда пöгреб. Кымын во колис, а талун кежлö ставыс на бур, дзоньталыштасны да водзö олöны. Кöть и важкодьöсь нин кыпöдöмъясыс, а наöн век на вöдитчöны. Жытникас быдсяма эмбур куйлö: потш вылын öшалö паськöм, а сы улын сулалöны сундукъяс. Кöзöда пöгребнас вöдитчöны сöмын шоныд кадö – тулыссянь гожöм помöдз, сы вöсна стен бöкъясас видзöны ковтöм кöлуй. Кыпöдöмъясыс абу ыджыдöсь, важысла нин неуна пуксьöмны муас. Сулалöны косінын, лыа му вылын. Сёя му вылö пöгребсö некор эз сувтöдны, медым кöзöдысь сылöм лымйыс сразу муніс. Öдзöсъясыс ичöтöсь, сöмын бура копытчöмöн артмö пырны. Öдзöсыс öшалö ыджыд дзиръяс вылын, сiдзжö важöн игнавлiсны амбарнöй томанöн. Öні нин ключыс вошöма, да мöд замок пуктiсны.

Пöгребын гуыс вевттьöма, мед пö кöдзыдыс оз пет. Джоджас вöчöмны öдзöстор, мукöд овмöсын овлö мый, сöмын пöвъяс пуктöны. Гуас сюйöмны керъясысь тшупöм сруб, муыс мед оз киссьы. Тулыснас, кос му тöлысьö, шоныд лунö, кор лымйыс бура сылö, сійöс пу зырйöн пыртлöны пöгребас öшиньторöд. Öти морт ывлаын шыблалö, пытшкас мöд – гуö койö да бура трамбуйтö-талялö. Мыйла колö ва лым? Сы вöсна, мый кодзыднас кос лымсö кö пыртан, сійö шоныднас регыд сылас, а ва лымйыс бура пуксьö да дыр олö. Тайö лымсö кöзöдöн шуöны. Бöчкаö либö пöртйö пуктöны сола яй да нуöны кöбрегö. Кöзöдас сюйöны да вылісянь лымнас тыртöны. Сiйö вочасöн  гожöм помöдз сылö. Мукöддырйи и йöв петкöдлiсны кöзöдас – лым вылö пуктасны, сливкиасьны колясны. Тулыснас кольöма на кö пуöм либö солалöм капуста, сійöс сідзжö сэтчö пуктылісны.

Öнiя кадö мортыд холодильникъяс да морозильнöй камераяс ньöбалö, оз нин стрöит кöбрегъяс, но сюрöны на сэтшöм овмöсъяс, кöні кöбрегö тулыснас картупель да мукöд град выв пуктас сюйöны, медым дыр эз рушмы да мöд урожайöдз тырмис.

Аттьö кывзöмысь!

Öшмöсъяс.

1. Информант – Урнышева Елена Александровна.
2. Öтуввез.
3.  Традиционная культура народа коми: этнографические очерки. Сыктывкар, 1994.