Уастырджи

      Абон ирон адœм кувынц Уастырджимœ. Табу йын кœнœм, нœхи йыл фœдзœхсœм.

     Ирон динуырнынадмœ гœсгœ, Уастырджи у нœлгоймœгты, бœлцœтты œмœ хœстон адœмы бардуаг. Сылгоймœгтœн йœ ном дзурыны бар нœ уыдис. Хуыдтой йœ œмœ йœ хонынц «лœгты дзуар».

      Абайты Васойы этимологимœ гœсгœ,( зонады дœр ацы хъуыды ныффидар ис), дзырд Уастырджы у сыгъдœг Георгийы номы ирон формœ: уац – сыгъдœг, стыр, джи-«Джио, Георгий», ома «сыгъдœг стыр Георгий». Дыгурон диалекты баззад йœ рагондœр формœ – Уас Георги.

      Адœмы ʹхсœн уœвынад кœны дыууœ ныхмœвœрд хъуыдыйы: иутœ дзурынц, зœгъгœ, Уастырджы œмœ сыгъдœг Георгий иу бардуаг у, ницы хицœндзинад ис сеʹхсœн. Иннœтœ разы не сты ацы цœстœнгасимœ: Уастырджы œмœ сыгъдœг Георгий иу неʹсты. Уœдœ чи у Уастырджы œмœ куыд баст у сыгъдœг уд Георгиимœ?

      Сыгъдœг Георгий уыд реалон историон адœймаг. Райгуырд Кападокийы  хъœздыг бинонты ʹхсœн. Уыдис Римаг œфсады офицер.Георгий чырыстон диныл хœст у, уый куы базыдта паддзах Диоклетиан, уœдœй œрцахсын кодта. Цалдœр мœйы йœ хъизœмарœй мардтой: домдтой дзы, цœмœй йœ диныл йœ къух сиса. Фœлœ уый нœ разы кодта. Йœ хъизœмœртты кœрон œм ныккœндмœ Диоклетиан ныххызт. Георгий йын загъта: «Ахœссут мœ Аполлоны кувœндонмœ.» Бахастой йœ кувœндонмœ.Сыгъдœг уд слœууыд урс цыртсурœты раз, œмœ йын алчидœр фехъуыста йœ ныхас: « Ау, дœу тыххœй цœуын мœлœтмœ? Æмœ куыд Хуыцау, афтœ дœуœн дœ бон у мœнœй ацы нывонд айсын?» Ацы ныхœстимœ Георгий дзуœрттœ бафтыдта йœхиуыл дœр œмœ цыртсурœтыл дœр. Георгийœн ралыг кодтой йœ сœр. Ныгœд œрцыд Израилы, горœт Лоды.

    Зынгœ ирон этнолог Уарзиаты Вилены хъуыдымœ гœсгœ,  Кавказы сыгъдœг Георгийœн табу кœнын райдыдтой, сыгъдœг Нино чырыстон дин парахат кœнын куы райдыдта ибертœ œмœ алантыʹхсœн, уœд.Чырыстъийы ахуырад парахатгœнгœйœ, сыгъдœг Нино, œвœццœгœн, ской кодта йœ хœстœг стырхъизœмаргœнœг Георгийы кой дœр. Уœдœй баззади ирон адœммœ дœр ноябыры 20-œм бонты Уастырджийы мысœн бонтœ кœнын: уыцы бонты сыгъдœг Георгийы цалхыл бабастой (колесовали).

   Астœуккаг œнусты ацы сыгъдœг удœн йœ кой дардыл айхъуыстис. Йœ фœлгонц бацахста иуœй-иу мифо-эпикон персонажты бынат, œвœрд сыл œрцыд куыд œддаг цъар.

   Алантœ-ирœттœ дœр ацы хабарœй иуварс нœ аззадысты. Æвœццœгœн, алантœм чырыстон дины агъоммœ уœвынад кодта ахœм уœларвон тых-бардуаг, кœцыйы фœлгонц œмœ функцитœ œввахс лœууыдысты Георгийы фœлгонц œмœ функцитœм, кœцыйœн уœлдай табу кодтой хœстон адœм. Иудзырдœй, Уастырджи œвдисы алайнаг œмбарынады культурон-историон хицœндзинœдтœ. Йœ фœлгонц ист у рагон индо-ирайнаг иудзинады рœстœджы ирон динуырнынады этникон пантеонœй.

    Сыгъдœг Георгийы бирœ хъизœмœртты фœстœ куы амардтой, уœд ын йœ буар уœнгтыл ныддихтœ кодтой. Иуœй-иу историктœ дзурынц, зœгъгœ, йœ сœр œвœрд œрцыд Хуссар Ирыстоны, Джеры дзуары. Уымœ гœсгœ Джеры дзуары хонынц Джеры сœр дœр. Йœ кувœнбонтœ райдайынц августы кœрон œмœ аххœссынц суанг Джеоргуыбайы мœймœ: бœрœгбон уœд йœ тынджы бацœуы.

     Ирыстоны рœсугъд œрдзы хъœбысы пырх сты Уастырджийы кувœндœттœ. Ахуыргæндтæ дæр раиртæстой, ацы кувæн бынæттæ кæмыты бæлвырдгонд æрцыдысты, уыцы рæтты кæй цæуы цавæрдæр æнæзынгæ, æнахуыр тæлм, кæцы хорзæрдæм ахъаз кæны адæймаджы зондахаст, зæрдæйы уаг æмæ æнæниздзинадæн.Ирон адœм кувынц œмœ табу кœнынц ацы бардуагœн уœлдай ахъаззагдœрœй. Цœй œмœ йœм мах дœр баулœфœм, нœ куывд нын фœрнœй айсœд.

Гъе, Уастырджи, ракœс, цœмœй

Нœ фœуœм бынтондœр фыдвœндаг!..