Рагон нœртон лœгау зарын куы зонин

Рагон нœртон лœгау зарын куы зонин,

Арвмœ куы хъуысид мœ фœндыры хъазт, -

Дунеты сеппœт мœхимœ œрхонин.

Радзурин сын уœд мœ зœрдœйы маст.

Къоста

            Нœ фыдœлтœм фœндыр кœд фœзынд, уый зын зœгъœн у.Бœлвырд у уый, œмœ нœм тынг рагœй кœй уœвынад кœны: хъисын-фœндыр, дала-фœндыр, дыууадœстœнон фœндыр.

           Фœндырыл цœгъдœг адœм нымад œмœ кадджын уыдысты. Уыдон дзыхœй-дзыхмœ истой œмœ нœм œрхœццœ кодтой нœ œвœджиау рœсугъд œмœ хъœздыг адœмон сфœлдыстад. Хъœубœстœ-иу œрœмбырд сты кадœггœнœджы алыварс œмœ хъуыстой ивгъуыд œнусты хабœрттœ œмœ кадджытœм.

             Адœм фœндыры схайджын кодтой цавœрдœр уœларвон тыхтœй. Ууыл дзурœг сты иуœй-иу традицитœ, œгъдœуттœ.

           Мард ирон адœммœ кадджын у: мард œмœ, дам, дзуар иу сты. Œхсœвбадœнты-иу хъисын-фœндырыл цœгъдœг œввахс œрбадт тœбœтмœ, райста-иу фœндыр œмœ сабыргай зœлыдысты куырыхон цœгъдœджы таурœгътœ. Œвœццœгœн, цагъды руаджы адœм ныхас кодтой йеʼнусон бынатмœ араст уœвœджы удимœ.

           Нœ алыварс цы рœсугъд œрдз ис, уый адœймаджы цœст рœвдауы сœрдœй-зымœгœй. Фœлœ нœ фыдœлтœ тыхстысты хœхты œвадат уавœртœй. Зœйцœуœн сты нœ хœхтœ.Бирœ адœм бабын кодтой œрдзы тыхтœ:зœйы бын чи фœци, уыдон агурын хъуыд œмœ ирон œгъдаумœ гœсгœ бавœрын. Рахаста ирон лœг йœ фœндыр, зœй кœм œрцыд, уырдœм: бабын йœ сыхаг. Хъисын-фœндырыл цœгъдгœйœ агурын райдыдтой зœйсœфцы. Фœндыры хъœлœс-иу кœм бамынœг, уым агурын хъœуы марды.

              Уымœй дарддœр ма, хъисын-фœндыры зœлынадмœ гœсгœ боныхъœд дœр бœрœг кодтой. Хурбонты асœст куы хъуамœ фœивтаид, уый хœдразмœ-иу фœндыр хъым-хъым кœнын райдыдта, ома йœ хъœлœс кодта мынœг, œдых. Дœсны цœгъдœгœн йœ бон уыдис боныхъœд цалдœр боныʼмгъуыдмœ рагацау сбœрœг кœнын.

           Цыма цавœр культон нысаниуœг ис хъисын-фœндырœн?

          Зынгœ францаг ахуыргонд Ж.Дюмезиль бирœ рœстœг œмœ тыхтœ бахардз кодта Нарты кадджытœ иртасыныл. Уый зонады ныффидар кодта ахœм хъуыды, зœгъгœ, нартœ, скифтœ œмœ абоны ирœттœ тынг œнгом баст сты.

            Геродоты œрфыстытœм гœсгœ, скифœгтœм уœларвœй œрхаудысты сыгъзœрин дзауматœ: къœлœт, гутон, арц œмœ къус. Ацы мигœнœнты нымœц œнœхъуаджы нœу: арц нысан кœны тых, къœлœт œмœ гутон – мулк, къусœн та уыдис культон нысаниуœг.Куыд зонœм, афтœмœй Нарты œхсœнад дœр дих кодтой œртœ мыггагыл: Œхсœртœггатœ уыдысты фидар, тыхджын адœм, хауы сœм арц; Борœтœ мулкджын адœм – гутон œмœ къœлœт; Алœгатœ кувœг адœм, хауы сœм къус.

                Нартœ Алœгаты хœдзары бадтысты куывды фынгтыл. Уыдонмœ уыдис диссаджы къус Уацамонгœ. Œрмœстдœр раст, тыхджын, хъœбатыр œмœ ныфсджын адœймаг банызтаид œлутон Уацамонгœйœ.

               Дзырд «Уацамонгœ»-йœн йœ фыццаг хай уац, ома хабар, œмбœлы уœларвон тыхты нœмтты: Уацилла, Уастырджи. Дюмезиль куыд зœгъы, афтœмœй дзырд «уац», œвœццœгœн, нысан кœны «кувын» дœр.

              Уœдœ къусœн скифœгтœм уыдис ритуалон нысаниуœг, Нартœн сœ куывды œнœмœнгхъœуœг мигœнœн, абоны ирœттœм дœр нœ фесœфта йœ фыццаг религиозон нысаниуœг. Уымœн œвдисœн сты нœ фынджы œгъдœуттœ.

              Ацы къультон мигœнœны бындурыл арœзт œрцыдис хъисын-фœндыр дœр: йœ сœйраг аразœг хай у къус.

              Зынгœ ирон композитор Œлборты Феликсы хъуыдымœ гœсгœ, ацы инструменты ном хъуамœ уыдаид дзырд-композит, йœ иу хай «къус» кœнœ «уац»-имœ. Уымœн œмœ ацы инструменты зœлтœй райдайынц дзурын «уац»-тœ, Нарты кадджытœ.

             Райста каддœггœнœг йœ фœндыр, дардыл зœлынц кадджытœ, хабœрттœ, уацтœ – кувы адœмœн куырыхон , дзырддзœугœ лœг.

           Абон ирон лœг куы фехъусы дзырд «фœндыр», уœд йœ цœстыты раз сœвзœры гармонь, фœлœ куы фехъусœм «ирон фœндыр», уœд œрымысœм Къостайы. Къоста зыдта фœндыры арф нысаниуœг ирон адœмы царды, œнкъарыдта йын йœ фидар тыхы œндœвдад. Къостайы «фœндыр» œнусты сœрты баризын кœны зœрдœ, уœнгты ахъары уœларвон зынгау, арф хъуыдытыл нœ œфтауы.

          Хъисын-фœндыры тœгтœй алкœцыйœн дœр ис йœхи ном: фыццаг – хъœргœнœг таг, дыккаг – амонœг таг, œртыккаг – хъырнœг таг. Къоста нœм œнусты сœрты хъœр кœны, амоны нын, фœлœ йын мах хъырнœг стœм, уый зын зœгъœн у.

œ