Сценарий праздника на алтайском языке

«Калганчы кÿзÿҥиниҥ байрамы»

Öткÿрер бÿдÿми: кöдÿрÿҥилÿ  текши школдыҥ линейказы

Амадузы: школ божотконы – ол jаан алтам, jаҥы,jаан jÿрÿмге кирер бозого деп ÿренчиктерге jартаары, школ, ада – эне, башкару деп jонjÿрÿмдик колбуларды тыҥыдары

Задачалар: ÿредÿниҥ бийик учурын jартаары, школ божоткон  ÿренчиктерди, ада – энелерин уткыыры, ÿредÿчиниҥ, школдыҥ бийик учурын кöдÿрери; jыл туркунына  «беш» темдектерге ÿренген ÿренчиктерди аҥылаары; алтай тилдиҥ jÿрÿмде учурын баалаарына  таскадары.

Туружар улус: школдыҥ ÿренчиктери, выпускниктер, ада – энелер, ÿредÿчилер, jурт, аймак башкаруныҥ, ÿредÿ бöлÿктиҥ чыгартулу  улузы

 Керектÿ материал: чечектер, баннер, «кейле учар» шар, шарлар

Öткÿрер öйи: кÿÿк айдыҥ 25 –чи кÿни

Байрамныҥ öдöр аайы:

(- школ керегинде кÿÿ ойнойт,  байрам öткÿреечи эки  ÿренчик чыгат)

Öткÿреечи: Jакшылыкту кÿнле, кÿндÿлÿ айылчылар, ÿредÿчилер, ада – энелер, ÿренчиктер! Такып ла школдыҥ база бир тÿÿкилик кÿни келди. Мындый байрам jаскыда, чечектеген, сÿÿнчиле толгон öйдö öдÿп турганы кандый эптÿ!

Öткÿреечи: Jыл туркунына кичеенип , jаҥыс ла «беш» темдектерге ÿренген ÿренчиктердиҥ  Кÿндÿниҥ доскозын ачарга  школдыҥ президенттин, текшишколдыҥ ада – энелериниҥ  комитединиҥ jаанын, школдыҥ директорын кычырып турубыс! (Кÿндÿниҥ доскозы ачылат, Мактулу листтер табыштырылат)

Öткÿреечи: Бистиҥ выпускниктерге бу jас кöп ижемjилер, jаҥыртулар экелер. Школдыҥ тÿÿкизиниҥ база бир бÿги бичилип калар.

                      Бÿгÿн омок кÿзÿҥи согулар,

                        Jе ол тегиндÿ эмес.

                        Тизилип барган öй ÿзÿлер

                        Уроктоҥ башка урок келер.

Öткÿреечи:   Табыштанып öкпööрöт выпускниктер,

                        Олордыҥ jаҥыган ÿндери коолойт.

                        Олорды эмди кереби сакыйт

                        Ыраак jолдорго öй тоолойт.

Öткÿреечи:     Эҥ jалтанбас олорды уткыйлы,

                          Школдыҥ куйун jылдарын öткöн

                           Jеҥÿниҥ jолыла jÿрÿмге чыгып,

                          Чыдалын, чактузын олор кöргÿскен!

( - фанфарлардыҥ табыжыныҥ кÿÿзи ойнойт)

Öткÿреечи: 11 класстыҥ ÿренчиктерин ле башкараачызын «Калганчы кÿзÿҥиниҥ» байрамына кычырадыс! (выпускниктер чыккылайт)

Öткÿреечи: «Калганчы кÿзÿҥиниҥ» байрамына учурлалган кöдÿриҥилÿ линейка ачык деп чоттолот.

( Арасейдиҥ гимни, Алтай Республиканыҥ гимни ээчий – деечий ойнойт)

Öткÿреечи: Качан да, он бир jыл кайра,

                       Качан агаштар алтын болордо,

                       Баштапкы кÿзÿҥи  шыҥыраган

                       Билгирге слерди кычырган.

Öткÿреечи:  Бÿгÿн слерде санааркаш та болор

                         Наjылар, таныштар, ада – энелер.

                         Кÿзÿҥи табыжы jÿрекке толор

                          Jаҥы jолдор слерге экелер.

Öткÿреечи: Кару выпускниктер, слерге  бÿгÿн аҥылу кÿзÿҥи шыҥыраар, ол ончозынаҥ башка угулар. Ол кÿзÿҥи – jаш туштыҥ ла jаан jÿрÿмниҥ ортодо кÿр. Эмди  jаан алтам эдерге слерди  ÿйдежип  келген  улустыҥ , слерди уткыырга келген айылчылардыҥ кÿÿнзегенин уксын деп сурап турубыс.

                            Айылчылар бÿгÿн сÿреен кöп

                             Наjылар, ÿредÿчилер, башчылар.

                              Школдыҥ бозогозын алтаарга,

                              Кару турага туштаарга.

Öткÿреечи: Уткуулду сöсти  аймактыҥ башчызыныҥ jонjÿрÿмдик сурактар аайынча ордынчызына…….бередис ( уткуул сöс айдылат)

Öткÿреечи: Ээчиде уткуул сöсти аймактыҥ ÿредÿ бöлÿгиниҥ баш специалистине бередис ( уткуул сöс айдат, спорт, ÿредÿ jанынаҥ аҥыланган выпускниктерге быйанду самаралар, грамоталар табыштырат)

Öткÿреечи:  Школ – ол кичинек тергее,

                       Кажы ла школдо бойыныҥ jасагы.

                       Чындык jолдоҥ туура чыкпаска,

                       Ӱредÿлÿ некелтенеҥ артпаска,

                        Тöп, ойгор башкараачыбыс бар.

- Уткуулду сöсти школдыҥ башкараачызына бередис (директор сöс айдат)

( алтай сÿÿнчилÿ кÿÿ ойнойт, сценага  чöрчöктиҥ сÿр – кебери  алтай кеп – кийимдÿ Талбак – Кулак деп койонок чыгат)

Талбак – Кулак: (  «кей» шарга jууктай jÿгÿрип келеле) Jе бу не? Бу не? Бу          качан божоор? 11 jыл öтти! Меге ойгор Мечиртке айткан , ÿрен Талбак – Кулак, ÿрен, философ болорыҥ. Эмди мен - философ», аралыма  учуп jанадым!

(чöрчöктиҥ сÿр – кебери Ырысту чыга конуп, койонокты токтодот)

Ырысту: А мен? А бу балдар? (выпускниктерге кöргÿзип).Бис канайдарыс?

Талбак – Кулак: Слерди билбезим, jе менде иш кöп: эрте турар, тал кыркыыр, чычкандар сÿрÿжер, кырлаҥ ажар, бöрÿнеҥ jажынар.

Ырысту:  Jе калак, 11 jыл кожо ÿрендис  не бу балдарла, эмди олорды артыргызып саларыс па? Jаан jÿрÿмге, jаҥы jолго кожо барактар!

Талбак – Кулак: Кожо? Jок. Эмеш сананып ийейин. Jе jакшы. Jаҥыс слер (выпускниктерге баштанып) ол jаан jÿрÿмге барарга белен бе меге кöргÿзер керек.  Ол тушта  кöрöрис.

Öткÿреечи: Слердиҥ алдыгарда бойыныҥ jайаандыгын 11 класстыҥ ÿренчиктери кöргÿзет.

( - выпускниктер  кожоҥ кожоҥдойт, сценка – ойын кöргÿскилейт)

Талбак – Кулак: Ырысту,  кандый кöрÿмjилÿ уулчактар, керсÿ кызычактар! Ӱредÿ – ол улу иш деп оҥдоп jадылар. Jе тÿрген барактар! (меҥдейт)

Ырысту: Талбак – Кулак, меҥдебе. Оноҥ ары кöрöли, эмди де öй бар(отурып  кöрöдилер).

Öткÿреечи:   Санааҥа кирет пе? Ол тушта

                       Айландыра талайдый чечектер болгон,

                   Энеҥниҥ колдорынаҥ сени алып,

                        Ӱредÿчи jылу колыла jединген.

                         Баштапкы класска сени кийдирген

                        Эмди де сениҥ колыҥ

                           Ӱредÿчиниҥ колында,

                            Канча да jылдар öткöндö,

                            Сен – ого ÿренчик,

                             Ол тушта, эмди, jажына!

Öткÿреечи: Кÿÿнземел сöс выпускниктердиҥ баштапкы ÿредÿчизине берилет (сöс айдат, ÿренчиктер чечектер сыйлайт)

Öткÿреечи: Слерди бÿгÿн ÿйдежерге баштапкы класстыҥ ÿренчиктери келген, уткыгар!

1 ÿренчик: Кару выпускниктерис,

                    Слерди ÿйдежип турус.

                    Карыкпагар, кичеенигер,

                    Тöрöл jеригерге туза эдигер.

2 ÿренчик:   Бу школдо jажытты,

                      Кöпти билип алдыгар.

                      Бастыра экзамендерди

                      Бештерге табыштырыгар!

3 ÿренчик:      Кару мениҥ наjыларым,

                      Сöзим мениҥ сÿреен ас.

                       Байлыкты эмес, билгирди

                       Кожо jолго алыгар.

4 ÿренчик:     Слер школды кичеедигер,

                      Кöпти ого эттигер.

                       Школдыҥ  ээлери эмди бис

                      Коомой болбозыс - чертенедис бис!

Öткÿреечи:  Ончо ÿредÿчилер слерге кару,

                       Кемди де слер ундыбагар!

                        Jе бирÿзи слерге артык, кÿÿни ару,

                       Класстыҥ башкараачызы бÿгÿн кунукпагар.

- Экинчи эне болгон ÿредÿчилерге сöс берилет ( класстыҥ башкараачызы сöс айдат, чечек сыйлаары)

Талбак – Кулак: (тура jÿгÿрип) Кандый jакшы выпускниктер! Мындый омок, санаалу балдарла буудакка  качан да туштабазыс! Ончогорды кожо алып учарым!

Ырысту: Меҥдебегер, кару наjым! Эҥ jуук улуска алкыш – быйан сöстöр айдылбаган  (jерине отургылайт).

11 класстыҥ ÿренчиги: Бисти 11 jылдыҥ туркунына школдоҥ сакып, бис учун кöп уйку jок тÿндер öткÿрген, бистиҥ jеҥÿлеристи ÿлешкен, кÿч айалгада «тайак»  болгон ада – энелериске быйанысты айдарга турус.

11 класстыҥ ÿренчиги:   Энем, адам, слерге бÿгÿн

                                             Чöгöдöп,  jабыс бажырадыс.

                                              Кару улузым, ай ла кÿн,

                                              Öкпööрип, быйаныс айдадыс.

Öткÿреечи: Карузыган балдарына алкыш – сöстöрин айтсын деп ада-  энелерди кычырып турубыс! ( ада – энелердиҥ комитединиҥ турчылары чыгат)

Ада – энелер: Ончо jакшы болзын, jолдор ачылзын,

                        Кÿчтеҥ, буудактаҥ коркыбагар.

                        Санаалар бÿтсин, jылдыс jарызын,

                        Ӱредÿчилерди, школды ундыбагар!

         Ончо jедимдÿ болзын, амаду бÿтсин

                         Бек сананып, ичкери алтагар.

        Сагыш кожулзын, укаа кöптöзин,

                        Jана баспай, öрö учугар!

Öткÿреечи: Калганчы кÿзÿҥиниҥ шыҥыртын согорына 11 класстыҥ ÿренчигин ………….ле  баштапкы класстыҥ ÿренчигин …….. .. кычырадыс! (кÿзÿҥи шыҥырайт)

( Выпускниктер эжерлежип  туруп jат,  «вальс» биjе биjелегилейт)

Талбак – Кулак: Калганчызында айдарга турганым:

        Кÿндер öдöр, jылдар jылыжар,

        Мениҥ сöзиме бÿдÿгер,

        Слерди ойто ло бери тартар.

        Школдыҥ кичинек кöзнöктöри

        Слерди каруузып «кычырар»,

        Мында jаш туштыҥ каткызы артар,

        Слерге эҥ артык ол угулар.

Ырысту: Öйис jетти, биске барар керек, учалы!

(- Талбак – Кулак выпускниктерге шарлар ÿлейт)

Талбак – Кулак:  Эмди ончобыс кожо амадубысты теҥериге божодолы! Ол кыйалта jоктоҥ бÿдер! Учугар!

( выпускниктер шарларын теҥериге божодот)

Öткÿреечи: «Калганчы кÿзÿҥиниҥ» байрамына учурлалган кöдÿриҥилÿ линейка jабылган деп чоттолот. Jакшы болзын!

(выпускниктер, эне – адалар, ÿредÿчилер «кей» шардыҥ jанына фотоjурукта туружат)