Ломанць и перьфпяльсь С.В. Аникинонь «На Чардыме» азкссонза

Ломанць и перьфпяльсь С. В. Аникинонь «На Чардыме» азкссонза

        С.Аникинонь  «На Чардыме» азкссонза оцю мяль шарфневи перьфпяльть образонцты, ломанть потмоёженц няфтеманцты.

         Азкссь сёрматфоль Швейцарияса 1910 кизоня, и лиссь «Вестник Европы»  журналть 1911 кизонь 11-це номерсонза. Чардым ляйнясь шудесь Аникинонь Камаевка шачема веленц вакска. Аф стак «С. Чардымский» лем ала лисендсть «Либеральная кукушка» сатирическяй азксоц и оржаста сёрматф лия произведениянза.

Мезень колга тя азкссь, кона Аникинонь творчествасонза арась эсь лацонь гимнакс шачема ширенцты?

Ушедови сон ваймоса эжнеф пейзажнай картинаста. «И афкукс, - сермады Аникин, - пара Чардымть маласа эрьхконясь.  Мянь ветешка вайгяльбес  таргавсь: оцю, сокта пяшкотьф сянгяря рама потмоса. Эрь шобдава и эрь илядне ванондсазь эздонза эсь мазышиснон стяй и мады зарятне - юрнай толса палыхть эсонза. А шить уендихть эзганза туцятне, и оцюфне, и ёмлатне, наряжакшнихть, бта простяма шинь ётафтома срхкасть. Финцне эздост великан ломанень кондямот, лиятне - чуда-зверькс няевихть. Аф пелезь и аф эряскодозь шарондыхть синь шинять мельге… Ведсь эрьхкса - аш лангсонза фкявок срмафкскя… А Чардым ляйть трваса лугатне парци потмос ваяфт, кудря шярямняда пяшксет, якстеряза кожфса симихть, бта моря ведь волнатне пряснон кепсихть да варма мельге панцихть» [19, с. 19].

Перьфпяльдень сембе природась, кода няфнесы Аникин, тундань тевса заняф: Чардымсь «эсь шачема шинцты аноклай», сон «шаржиясь, лакай, эйбокольса ёряй,  хрусталень  пакшса кальдерди, куфци, шофт ляценди и, бта кштимбачк веденц тяза-тоза лоськофнесы» [19, с. 23]. 

Аникинонь няфтемаса перьфпяльсь фалу эрек, мезе-бди то тии, то срафни; пяшксе мазышида и кельгомада, апак  каштортт и таколды, хоть тянди бта аш кодамовок туфтал. Шачема ширде мирть тяфта няфтемац виияфнесы марнек азксть лиризманц, архнесы сонь потмаширдень эпическяй и драматическяй тюсса - смузьса.

         Героензон Аникин няфнесыне эсь лацонза.  Аш кода мярьгомс: вов нят-главнайхне, а нят - аф. И шамор урозсь Емелька Косолапый, кона шаморшинц инкса тиевсь велеса пеетькшнема вастокс, и сонь ялгац Засыпка, и ляпе седи цёрашабась Васька - мордвин, и велень инь мазы стирсь Матрешка Тарасовась - сембе синь главнайхть и аф главнайхть, сяс мес азксть инь главнай героец - сонць авторсь.

          Пичефксонь канды ушетксокс азксса шамор пильге Емелькать Матрешкань мархта васедемац, стирть и цёрать ёткса седиваксстонь корхнемасна:

- Аськолян паксяста, кочкома вастста… Арьсекшнян – кода ётамс тона беряку? Тонь няихтень, кенярдень.

Емелять пароль мялезонза. Вов ба арамс меки ёмланякс-ёмланякс, иляназ шяярь цёранякс, вадерямс ляпоняста сонь кяденц. А Мотянясь корхталь тядянь вайгяльса:

- Эх, ёмланя, шава пряня!..

Павазсь ашезь тяльгонде Емелять мяштьс. Сон кельксезь ванондозе стирть, кулхцондсь эсонза стане, бта Мотянясь морась теенза седиваксстонь мора…

- Конашка вий эсот, Емеля! Венчти аньцек лийкстамс илядсь, шанчк паньцак.

- Кда мезе… Сашентт венчса уендема…

- Саян…праздникста…[19, с. 92].

 Матрёшка няи Емелькань эзда аф велень пеетькшнема васта, а стамка виде вайме ломань, кода и сонць. Стирсь, пади, васенцесь шарьхкодезе: велеряйхнень пеетькшнемаснон сюнеда Емелькань седиец бта ширькстафтовсь аф аньцек ломаттнень, но и перьфпяльдень мазышить эздовок. Тя васедемда меле Емелька инь питни лятфнембялькс ванфнесы Матрешкань руцянянц, конань стирсь прафтозе. Тя ульсь лятфнембяль аф аньцек стирть, а и бта одукс шачеманц колга кати кельгомань толнясь кфчядсь седисонза, кати ушедсь маряма прянц эрявиксокс ломаттненди - тянь колга авторсь видеста аф корхтай.

          Азксть героензон ёткса башка васта занци Васькань образоц. Писательть сембе литературнай героензон ёткса Васька - васенцесь, конань лемста содави нацианальностец. Лия героенза - прянь вятемань промозс и корхтафс коре - руз ломань. «Мордвин» валсь, улема, аф стак эвондась Швейцарияса улемстонза.

Эмиграцияса улемста Аникин сяда крхкаста арьсезевсь эсь мокшэрзянь юронзон колга, кармась лиякс ванома синь социальнай и нравственнай ширеснон лангс. Писательсь аф весть шарфты мяль Васькань ялганди лездома аноксшинц, ломань ёткса аф кяжиязь эряманц лангс. Тяка ёткть Васька фалу мезьда-бди пели. Аникин сувафни азксозонза пяк эсь лацонь деталь: ляй берякса зиянонь лисемда меле Васька крхтапа ласьки вели лезксонь вешема. Велеряйхне галошшинц бта афи няйсазь. Аф стак, улема, корхнихть: «Видешити щапне афи эрявихть».

Швейцарияста мрдамда мелевок мокшэрзятнень колга Степан Аникинонь  арьсеманза  кизоста  кизос  вихонзакшнесть. Тя няеви фольклорть колга мялензон, статьянзон и очерконзон эзда. Кода лятфни Аникинонь рьвац Эмилия Эдуардовна: «… Степан Васильевич сембе пингста лац корхтась эрзякс и мокшекс.

Кда сашендовсь улемс эрзянь велень митингса и кодамовок пуромксса - фалу корхнесь эсь кяльса. Швейцарияса эрямстонза, коса аф весть васетькшнесь васенце Думать членонц эрзять Григорий Карповичень мархта, эрзякс корхнесь сонь мархтонзовок. «На Чардыме» азксонц аделамда меле Женеваста фкя эсь сёрмасонза  писательсь тяштсь: «Шинек-венек ушедонь арьсема литературнай творчествать смузензон колга. Тя азксозень перфкя савсь возямс пяк ламос. И вов вдь дейкась кодама: тяса эрямстон пяк оржаста ушедонь  маряма  родной  эсь  кяленьконь мазышинц,  сонь вельденза ёфси аф стака няфтемс-панжемс ломанть седи-ваймонь мялензон-арьсеманзон». 

Но эсь кяльса сёрматф произведениянза Аникинонь аш. Туфталда тянди аф кржаль: эсь кяльса сёрматф ашель коса печатламс, апак кемокстактольхть эрзянь и мокшень кяльхнень литературнай нормасновок