" Демир-ужуум эшкииш кылгаш..." ( шулуктер Шилова Ч.Ч.)

Даа кожуун

Даа кожуун үе-дүптен

Тѳѳгүлүг ораным-дыр:

Байлак Вера, Сергей Шойгу

Баштай баскан чери чүве.

Хамнар угун шинчилеп кээр

Кенин-Лопсан база мында.

Оскал-оолдуӊ цириги-даа

Оон самнап үнген болгай.

Агып чыдар Чадаананы

Алдаржыткан Мерген-Херел.

Сагыш-сеткил уяраткан

Сайын-Хоо деп угбавыс бар.

Европаныӊ чемпиону

Опан Сатты кым-даа билир.

Кайгал-оол-даа, Конгар-оол-даа

Каргыраазын маӊаа хѳѳннээн.

Баштайгы кыс чогаалчывыс

Барыкаанны кым-даа утпас.

Сенгил  оглу Доржу Куулар-

Чечен чогаал критиги-дир.

Даа кожуун үе-дүптен

Тѳѳгүлүг ораным-дыр-

Хайдып оглу Бадыргыныӊ

Кадагалаан чурту чүве…

Үстүү-Хүрээ.

Далай-Лама, Богда  Кегээн

Моорлап  кээп,  ыдыктап  каан

Даа  кожуун  тѳвү  черде

Мѳргүл, номнуг  Үстүү-Хүрээм.

Сарыг  шажын  ѳѳредиин,

Ѳгбелерниӊ   сүзүглелин

Кайы  дүптен    кадагалаан

Кайгамчыктыг  Үстүү-Хүрээм.  

Чүдүлгевис   оруун  актаан

Чула  одуӊ   чырып  чорзун!

Хензиг   тыва  чонувустуӊ

Хей-аъды  бедик  чорзун!

Ѳршээ-ѳршээ…

Айлык черде уян кызыӊ сени сактып…

Талыгырда арт-сын ажыр эсти берген

Таӊды-Тывам,кайы  хире  чурттап тур сен?

Айлык черде уян кызыӊ сени сактып,

 Айлар, хүннер – эглир үем шуудуп ор мен.

Тоол шагныӊ хуулгаазын оранында

Саяннарым, Эне-Сайым, аймак чонум

Толдап каан дег, уйгу-дүштен ыравайн,

Сагыжымны сорунзалап туруп берди.

Дорзукпайым

Авазыныӊ чассыгбайы,

Адазыныӊ чоргааралы-

Хензиг оглум девип ойнааш,

Хевис орта удуй берди.

Чаптанчыг мээӊ дорзукпайым,

Шаа кээрге мѳге боор сен.

Амдыызында ойнап-мандып,

Ада-иеэ чассып ал че.

Шилова Чаяна, Чадаана.