Иҫәнғолова Рәмилә Ғималиддин ҡыҙы. "Телем бар"

       Телем бар!

                                                          
Күҙ алдымда телдәр гөлләмәһе:
Төрлө-төрлө сағыу ярайһы.
Ә мин- ябай ғына башҡорт ҡыҙы-
Берәм- берәм һайлап ҡарайым:
Бына - Гёте, Шиллер һөйләшкәне,
Ә тегеһе- Туҡай һүҙҙәре,
Байрон теле, Тагор һәм Навои…
Шундай матур яңғырай үҙҙәре!
Мин түгелме Пушкин шиғырының
Һәр һүҙенә ғашиҡ булманым?
Телдәр тулы гүзәл гөлләмәгә
Ҡарайым да, ҡарап туймайым.
Һәр ҡайһыһы иҫ китерлек күркәм,
Йор һәм нәфис, тапҡыр һүҙгә бай;
Әммә иң һәйбәтен бүләк иткән
Яҡташтарым Кинйә һәм Бикбай.
Тиңдәше юҡ ошо мәшһүр телдә
Яуға өндәп сапҡан Салауат,
Саф башҡортса,сәскә күңеленән
Рәми ағай яҙған аманат.
Эҙәрләүгә дусар ул заманда
Бирешмәйсә һис бер көскә лә
Туҙан баҫҡан ҡая-ташты ярып
Шытып сыҡҡан шиғыр-сәскәләр.
Күҙҙең яуын ала төҫкәйҙәре-
Гөлләмәлә күпме ғилем бар.
Әммә әллә ниндәй тылсымдарға
Алыштырмаҫ туған телем бар!